Тошкент шаҳрида хавфсиз муҳитни яратиш бўйича “пойтахт намунаси” Чилонзор туманида жорий этилмоқда
2026-01-31 14:00:00 / Янгиликлар
Ички ишлар вазири генерал-лейтенант Азиз Ташпулатов иштирокида, Тошкент шаҳрининг ҳуқуқни муҳофаза қилиш органлари раҳбарлари ва ходимлари, Чилонзор туман ҳокими ҳамда ҳамкор ташкилотларнинг масъуллари иштирокида Тошкент шаҳри Чилонзор туманида хавфсиз муҳитни шакллантириш ва жамоат хавфсизлигини ишончли таъминлаш масалалари бўйича жалб этилган шахсий таркибнинг кенгайтирилган хизмат олди йўриқномаси бўлиб ўтди.
Тадбирда Ўзбекистон Республикаси Президенти томонидан Тошкент шаҳрида ўтказилган танқидий селектор йиғилишида белгиланган вазифалар ижроси, жумладан, уюшган жиноятчилик, наркожиноятлар, кибержиноятчилик ва яширин иқтисодиётга қарши курашиш бўйича «пойтахт намунаси»ни Чилонзор туманида жорий этиш масалалари муҳокама қилинди.
Таъкидланганидек, туман аҳолиси ва транспорт оқимининг ортиши хавфсизликни таъминлашда янги ёндашувларни талаб этмоқда. Шу боис криминоген омилларни барвақт аниқлаш ва олдини олишга қаратилган тизимли ишларни кучайтириш устувор вазифа этиб белгиланди.
Жумладан, Чилонзор туманида хавфсиз муҳитни яратишда патрул-пост, йўл-патрул, қўриқлаш ва профилактика хизматлари тун-у кун, уч сменали хизмати давомида эътибор қаратилиши зарур бўлган асосий жиҳатлар тушунтириб ўтилди.
Энг муҳими, аксарият жиноят ва ҳуқуқбузарликларнинг содир этилиши тунги вақтга тўғри келаётганлигини инобатга олган ҳолда, тунги хизматга алоҳида масъулият билан ёндашиш зарурлиги таъкидланди. Масъулларга ҳар бир келиб тушган хабар бўйича воқеа жойига нарядларнинг 5 дақиқа ичида етиб боришини таъминлаш бўйича кўрсатмалар берилди.
Шунингдек, Чилонзор тумани ҳокимлиги томонидан ўз ҳудудида намунали хизмат фаолиятини ташкил этган профилактика инспекторлари доимий рағбатлантириш масалалари йўлга қўйилишини таъкидлаб ўтди.
Йўриқнома якунида хизмат вазифасини бажаришда сафдошларига ўрнак бўлаётган бир гуруҳ ички ишлар органлари ходимлари Ички ишлар вазири ҳамда туман ҳокимлиги томонидан тақдирланди.
Тадбирдан сўнг барча шахсий таркиб ва бириктирилган масъуллар белгиланган топшириқларнинг ижросини таъминлаш ва ўз хизмат вазифаларини бажариш учун маҳаллаларга йўналишди.