Бухоро вилояти ИИБ раҳбарияти иштирокида Олот туманида ёшлар билан учрашув бўлиб ўтди
2026-01-31 10:00:00 / Янгиликлар
Бухоро вилояти Олот туманида ёшлар билан ишлашнинг янгича тизимини ҳаётга татбиқ этиш, уларнинг муаммоларини бевосита ўрганиш ва ижобий ҳал этиш мақсадида маънавий-маърифий учрашув бўлиб ўтди.
Вилоят Ички ишлар бошқармаси бошлиғи ҳамда Олот тумани ҳокими иштирокида ташкил этилган ушбу очиқ мулоқотга тумандаги оталиққа олинган ҳамда уюшмаган ёшлардан иборат 200 нафардан зиёд йигит-қизлар таклиф этилди.
Тадбир аввалида Бухоро вилояти Ички ишлар бошқармаси бошлиғи сўзга чиқиб, йиғилганларга ўзининг ҳаёт йўли, хизмат пиллапояларидаги машаққатлар, эришилган ютуқлар ва унинг ортидаги тинимсиз меҳнат ҳақида самимий ҳикоя қилиб берди. Раҳбарнинг ҳаётий тажрибаларга асосланган ушбу «мастер-класс»и ёшларда катта таассурот қолдириб, уларни тўғри мақсад қўйишга руҳлантирди.
Очиқ мулоқот тарзида кечган учрашувда ёшлар ўзларини қийнаётган масалалар юзасидан раҳбарларга тўғридан-тўғри мурожаат қилдилар.
Хусусан, учрашувда бандлик ва ишга жойлашиш, ижтимоий ва моддий ёрдам олиш, тадбиркорликни бошлаш учун кредит ва субсидиялар ажратиш, соғлиқни тиклаш ва таълим контрактларини тўлаш каби масалалар ўртага ташланди.
Мурожаатларнинг аксарияти жойида ҳал этилган бўлса, вақт талаб этадиган масалалар бўйича масъулларга аниқ топшириқлар берилиб, ижроси қатъий назоратга олинди.
Шунингдек, тадбирда эл ардоғидаги нуронийлар ҳам сўзга чиқиб, ёшларга ўзларининг қимматли ўгитларини бердилар, ҳалол меҳнат ва ватанпарварлик инсонни улуғлашини ҳаётий мисоллар орқали тушунтирдилар.
Учрашув сўнгида ўзининг иқтидори, жамоат ишларидаги фаоллиги ва юқори натижалари билан тенгдошларига ўрнак бўлиб келаётган бир гуруҳ ёшлар раҳбарлар томонидан китоблар жамланмаси ҳамда қимматбаҳо эсдалик совғалари билан тақдирландилар.
Бу каби учрашувлар ёшларнинг эртанги кунга бўлган ишончини мустаҳкамлашга хизмат қилиши билан аҳамиятлидир.
Бухоро вилояти ИИБ Ахборот хизмати