Наманган вилоятида ижтимоий-иқтисодий ривожланиш ва ҳудудларда хавфсиз муҳитни таъминлаш масалалари муҳокама қилинди
2026-01-30 11:30:00 / Янгиликлар
Наманган шаҳридаги «Маърифат маскани»да Халқ депутатлари вилоят Кенгашининг ўн саккизинчи сессияси бўлиб ўтди. Унда вилоят Кенгаши депутатлари, вилоят ҳокими ва унинг ўринбосарлари, ҳуқуқни муҳофаза қилувчи органлар ҳамда масъул ташкилот раҳбарлари иштирокида ҳудуднинг ижтимоий-иқтисодий ривожланиши, маҳаллий бюджет ижроси ва 20 га яқин бошқа муҳим масалалар атрофлича кўриб чиқилди. Сессия давомида вилоят ИИБ бошлиғининг 2025 йил давомида жиноятчиликнинг олдини олиш ва маҳаллаларда хавфсиз муҳитни шакллантириш борасидаги ҳисоботи ҳамда Йўл ҳаракати хавфсизлиги бошқармаси бошлиғининг йўл инфратузилмасини яхшилаш бўйича амалга оширган ишлари юзасидан маълумотлари тингланди.
Шу билан бирга, ҳудудда Ўзбекистон Республикаси Президентининг 2026 йил 5 январдаги ПҚ-1 ва ПҚ-2-сонли қарорлари ижросини таъминлаш мақсадида вилоят Ички ишлар бошқармаси раҳбариятидан иборат ишчи гуруҳ томонидан изчил ўрганишлар олиб борилмоқда. Хусусан, ишчи гуруҳ аъзолари Мингбулоқ ва Тўрақўрғон туманларида бўлиб, криминоген вазияти оғир бўлган «қизил» тоифадаги маҳаллалар фаолиятини таҳлил қилдилар. Жараёнда Мингбулоқ туманидаги «Фаровон» ҳамда Тўрақўрғон туманидаги «Гулқишлоқ» маҳаллаларида содир этилган ўта оғир турдаги жиноятларнинг келиб чиқиш сабаблари ва уларга имкон берган шарт-шароитлар мутасаддилар иштирокида алоҳида муҳокама этилди.
Ўрганиш ишлари доирасида Мингбулоқ туманининг «Мустақиллик» ва Тўрақўрғон туманининг «Туркистон» маҳаллаларида ҳам Президент қарорлари ижросини самарали ташкил этиш бўйича кўрсатмалар берилди. Масъул идоралар ва бириктирилган ходимлар ўртасида ўзаро ҳамкорликни кучайтириш, аҳоли осойишталигини таъминлаш учун манзилли профилактик чора-тадбирларни амалга ошириш юзасидан аниқ вазифалар белгилаб берилди. Бу каби тадбирлар вилоят ҳудудида жиноятчиликнинг барвақт олдини олиш ва аҳоли хавфсизлигини мустаҳкамлашга қаратилган.
Наманган вилояти ИИБ Ахборот хизмати