Сурхондарё вилояти ИИБ раҳбарияти ташаббуси билан Деновда уюшмаган ёшлар билан учрашув бўлиб ўтди
2026-01-27 09:00:00 / Янгиликлар
Денов туманида Сурхондарё вилояти Ички ишлар бошқармаси бошлиғи полковник Тимур Исмаилов томонидан Денов, Сариосиё ва Узун туманларида истиқомат қилувчи уюшмаган ёшлар билан учрашув ташкил этилди.
Унда туман ҳокими ва жамоатчилик вакиллари ҳамда шаҳар-туман ёшлари иштирок этди.
Учрашувдан кўзланган асосий мақсад — ёшларни қийнаётган муаммоларни ўрганиш, уларнинг таклиф ва ташаббусларини қўллаб-қувватлаш, шунингдек, жамиятда фаол, қонунга ҳурмат руҳида тарбияланган авлодни шакллантиришдан иборат бўлди.
Тадбир давомида вилоят ИИБ бошлиғи ёшлар билан юзма-юз мулоқот қилиб, уларнинг бандлигини таъминлаш, касб-ҳунарга йўналтириш, бўш вақтни мазмунли ташкил этиш масалаларига алоҳида эътибор қаратди.
Шунингдек, ёшлар орасида ҳуқуқбузарликларнинг олдини олиш, зарарли одатлардан йироқ бўлиш мавзуларида ҳаётий мисоллар асосида алоҳида тўхталиб ўтилди. Ёшлар ўзларини қизиқтирган саволларга батафсил жавоблар олдилар.
Сурхондарё вилояти ИИБ Ахборот хизмати