Ўзбекистон Республикаси Ички ишлар вазирлиги

Ўтган давр мобайнида вилоят ҳудудида жиноят ва ҳуқуқбузарликларнинг олдини олиш борасида амалга оширилган ишлар, йўл қўйилган хато ва камчиликлар ҳамда келгусидаги устувор вазифалар муҳокамасига бағишланган йиғилишда Ички ишлар вазири ўринбосари, генерал-майор Б.Ю.Мирзарахимов, вилоят ИИБ бошлиғи полковник А.Д.Тасбаев, бошқарма бошлиғи ўринбосарлари, соҳавий хизмат ҳамда шаҳар-туман ИИБ раҳбарлари иштирок этишди.

Вилоят ИИБ бошлиғи сўз олиб, кун тартибидаги масалалар билан таништирди. Сўнг вилоят ҳудудида ҳуқуқбузарлик ва жиноятчиликнинг барвақт олдини олиш, криминоген вазияти оғир бўлган ҳудудлар, жиноятчиликни жиловлашда йўл қўйилган камчиликлар ва бу борада ички ишлар бўлимлари ва соҳавий хизматларнинг фаолиятлари таҳлил қилинди.

Шунингдек мамлакатимиз раҳбари томонидан маҳаллаларда хавфсиз муҳитни яратишга қаратилган қарорнинг мазмун моҳияти, ижросини таъминлашда еттилик ва ҳуқуқни муҳофаза қилувчи бошқа органлар билан ҳамкорликни мустаҳкамлаш хусусида сўз борди.

Бундан ташқари фуқаролар мурожаатларини ўрганиш, тез ва сифатли ҳал этиш, хизмат интизоми ҳамда қонунчилик талабларига қатъий риоя этиш юзасидан тегишли кўрсатмалар берилди.

Навоий, Зарафшон шаҳарлари, Хатирчи, Кармана, Навбаҳор, Томди туманларида жиноят ва ҳуқуқбузарликлар, йўл-транспорт ҳодисалари бирмунчага ошганлиги, профилактик ишлар етарли даражада йўлга қўйилмаганлиги танқид остига олинди.

Келгусида жиноятчиликни олдини олиш, жиловлаш ва фош этиш, фуқаролар тинчлиги, осойишталигини таъминлаш борасида масъулларга зарур топшириқлар берилди.

Навоий вилояти ИИБ Ахборот хизмати