Сайёр қабуллар орқали миграция соҳасида мурожаатлар тезкор ва манзилли ечим топмоқда
2026-01-21 09:00:00 / Янгиликлар
«Инсон қадри учун» тамойили асосида Ички ишлар вазирлиги тизимида фуқароларга қулай ва тезкор давлат хизматларини кўрсатиш ҳамда мурожаатларга манзилли ечим топиш мақсадида шахсий ва сайёр қабуллар мунтазам ташкил этиб келинмоқда.
Мазкур йўналишдаги амалий ишларнинг давоми сифатида Тошкент вилояти ИИББ Миграция ва фуқароликни расмийлаштириш бошқармаси томонидан мурожаатлар кўп келиб тушаётган ҳудудларда навбатдаги сайёр қабуллар ўтказилди.
Хусусан, Бекобод шаҳри ва тумани ҳамда Олмалиқ шаҳрида миграция ва фуқаролик масалаларига бағишланган сайёр қабуллар давомида Бекобод ҳудудида 80 дан ортиқ мурожаат ўрганилган бўлса, Олмалиқда эса 140 нафар фуқаронинг мурожаати кўриб чиқилди.
Ушбу мурожаатларнинг 100 дан ортиғи Ўзбекистон Республикаси фуқаролигини олиш йўналишида бўлиб, 62 нафар шахсдан фуқароликни олиш учун ҳужжатлар қабул қилинган бўлса, 44 нафар мурожаатчига фуқаролик олиш тартиби ва қонунчилик талаблари юзасидан ҳуқуқий тушунтиришлар берилди.
Шунингдек, ёши ва соғлиғи сабабли миграция бўлинмаларига келиш имконияти бўлмаган, ижтимоий ҳимояга муҳтож Бекободда 24 нафар, Олмалиқда 30 нафар фуқаронинг яшаш манзилида ID-карта расмийлаштириш учун ҳужжатлар қабул қилиниб, ID-карталар шу куннинг ўзида топширилиши таъминланди.
Паспорт маълумотларидаги техник хатоликлар бўйича 10 нафар фуқаронинг мурожаати жойида бартараф этилди.
Бундан ташқари, сайёр қабуллар давомида миграция ва паспорт қоидаларига риоя этилиши юзасидан профилактик тадбирлар ҳам ўтказилди. Назорат жараёнида Бекободда 5 нафар, Олмалиқда 18 нафар хорижий фуқаронинг Ўзбекистон Республикасида бўлиш ва яшаш қоидаларини бузганлиги аниқланиб, қонунчиликка мувофиқ чоралар кўрилди.
Тадбирлар якунида вилоятда доимий яшовчи 11 нафар фуқаролиги бўлмаган шахс Ўзбекистон Республикаси фуқаролигига қабул қилингани муносабати билан уларга расмийлаштирилган ID-карталар тантанали равишда топширилди.
Умуман олганда, мазкур ҳудудларда ўтказилган сайёр қабуллар давомида миграция ва фуқаролик масалаларига оид 220 дан ортиқ мурожаат кўриб чиқилиб, уларнинг 160 таси ёки 72 фоизи қабул жараёнидаёқ ижобий ҳал этилди.
Бу каби сайёр қабуллар фуқароларнинг мурожаатларини тезкор ва манзилли ҳал этиш, шунингдек миграция соҳасида давлат хизматлари сифатини оширишга хизмат қилмоқда.
Тошкент вилояти ИИББ Ахборот хизмати