Қашқадарёда Президент қарорлари ижроси доирасида «қизил» тоифадаги маҳаллалар бўйича семинар-тренинглар ўтказилмоқда
2026-01-20 13:35:00 / Янгиликлар
Қашқадарё вилоятида давлат раҳбарининг маҳаллаларда хавфсиз муҳитни яратиш, ҳуқуқбузарликлар профилактикасини кучайтириш ва жиноятларни барвақт олдини олишга қаратилган ПҚ-1 ва ПҚ-2-сонли қарорлари ижроси доирасида «қизил» тоифадаги маҳаллаларга бириктирилган масъуллар ҳамда маҳалла еттилиги иштирокида қисқа муддатли семинар-тренинглар ташкил этилмоқда.
Тадбирларда вилоят ИИБ бошлиғи полковник Абдувохид Исмоилов иштирок этиб, жиноятчиликнинг олдини олиш, видеокузатув воситаларини жорий этиш, хонадон ва савдо шохобчаларини пультга улаш, «хавфсиз кўча» ва «хавфсиз йўлак»лар ташкил этиш каби йўналишларда амалга оширилган ишлар тақдимотини кўриб чиқди. Ижобий натижалар билан бирга мавжуд камчиликлар ҳам танқидий таҳлил қилинди.
Шунингдек, вилоят миқёсида «қизил» тоифадаги ҳудудларда амалга оширилиши лозим бўлган устувор вазифалар кўргазмали тарзда иштирокчиларга етказилди. Семинар давомида бир қатор туманлар масъуллари ўз ҳудудларида хавфсиз муҳитни шакллантириш ва жамоат тартибини таъминлаш бўйича амалга оширилган ишлар юзасидан маълумот бердилар.
Йиғилиш натижасида «Йўл харитаси» асосида «Обод ва хавфсиз маҳалла/ҳудуд» тамойилини татбиқ этиш, жиноятларнинг барвақт профилактикасини комплекс ташкил этиш, аҳоли, айниқса ёшлар ва хотин-қизлар бандлигини таъминлаш бўйича масъуллар ва маҳалла еттилигига аниқ вазифалар юкланди.
Қашқадарё вилояти ИИБ Ахборот хизмати