Тошкент вилояти Ички ишлар бош бошқармасида “14 январь — Ватан ҳимоячилари куни” муносабати билан тантанали тадбир бўлиб ўтди
2026-01-16 14:00:00 / Янгиликлар
Тошкент вилояти Ички ишлар бош бошқармасида Ўзбекистон Республикаси Қуролли Кучлари ташкил этилганининг 34 йиллиги ҳамда “14 январь — Ватан ҳимоячилари куни” муносабати билан тантанали тадбир бўлиб ўтди.
Тадбирда Тошкент вилояти ИИББ бошлиғи, полковник Абдувосит Абдуразаков раҳбарлигида бошқарма шахсий таркиби, ички ишлар органлари фахрийлари ҳамда таклиф этилган меҳмонлар иштирок этди.
Дастлаб бошқарма бошлиғи Ички ишлар вазирининг байрам табригини ўқиб эшиттирди. Унда Ватан ҳимояси, юрт осойишталиги, аҳоли тинчлиги ва хавфсизлигини таъминлаш, шунингдек, фуқароларнинг қонуний манфаатларини ҳимоя қилишда ички ишлар органлари ходимларининг муҳим ва беқиёс ҳиссаси алоҳида таъкидланди. Шундан сўнг йиғилганлар Ватан ҳимоячилари куни билан самимий муборакбод этилди.
Тадбир якунида хизмат фаолиятида юқори натижаларга эришган бир гуруҳ ходимларга Ички ишлар вазирлиги томонидан берилган кўкрак нишонлари, фахрий ёрлиқлар, китоблар тўплами ҳамда муддатидан аввал берилган махсус унвонлар тантанали равишда топширилди.
Тошкент вилояти ИИББ Ахборот хизмати