Қашқадарё вилояти ИИБда ўтган йилда амалга оширилган ишлар, бошқарув ва хизмат фаолияти самарадорлигини оширишга қаратилган таҳлилий-танқидий йиғилиш бўлиб ўтди
2026-01-13 09:35:00 / Янгиликлар
Қашқадарё вилояти Ички ишлар бошқармаси бошлиғи раҳбарлигида бўлиб ўтган йиғилишда бошқарма бошлиғи ўринбосарлари, соҳавий хизматлар раҳбарлари, шунингдек, шаҳар ва туман ички ишлар бўлимлари бошлиқлари ҳамда шахсий таркиби видеоселектор тарзида иштирок этди.
Йиғилишда бошқарма бошлиғи, полковник Абдувохид Исмоилов сўзга чиқиб, Юртбошимиз томонидан 2025 йил якунлари бўйича Ўзбекистон халқига йўлланган Мурожаатномасида белгилаб берилган 6 та устувор йўналиш ҳамда Ўзбекистон Республикаси Президентининг 2026 йил 5 январь куни қабул қилинган 1-сон ҳамда 2-сон қарорлари, шунингдек, Ички ишлар вазирлиги томонидан қабул қилинган буйруқ ва фармойишлар мазмун-моҳияти шахсий таркибга атрофлича тўлиқ тушунтирди.
Муҳтарам Президентимиз томонидан 2026 йил Ўзбекистонда «Маҳаллани ривожлантириш ва жамиятни юксалтириш йили» деб эълон қилинганини таъкидлаб, Давлат раҳбарининг қарорлари ижроси доирасида маҳаллалар хавфсизлиги, жиноятчилик профилактикаси, ёшлар билан ишлар тадбирларини янада жадаллаштириш лозимлиги барча шахсий таркиб эътиборига етказилди.
Йиғилишда кузатилган йилда аввало, воҳада хавфсиз ва соғлом муҳитни яратиш, жиноятларни олдини олиш, содир этилганларини фош этиш, ахборот технологиялари соҳасидаги жиноятлар, ҳуқуқбузарликларга барҳам бериш, жамоат тартиби ва фуқаролар хавфсизлигини таъминлаш борасида амалга оширилган ишлар соҳавий хизматлар бўйича алоҳида-алоҳида танқидий-таҳлил этилди.
Танқидий руҳда ўтган йиғилишда ички ишлар органлари раҳбар кадрларининг бошқарув фаолиятини янада такомиллаштириш ҳамда хизмат фаолиятида самарадорликка эришиш, хизмат давомида эришилган ютуқлар билан бирга йўл қўйилган камчиликлари таҳлил этилиб, масъуллар олдига аниқ вазифалар қўйилди.
Жараёнда хизматни самарали ташкиллаштириш, бошқарув қарорларини ўз вақтида ва сифатли ижро этиш, хизмат интизомини мустаҳкамлаш, қонун талабларига қатъий риоя этиш масалалари ҳам муҳокама қилинди.
Ҳар бир соҳавий хизматнинг фаолият йўналишига оид долзарб масалалар, раҳбар кадрларга хизмат фаолиятини янада самарали ташкил этиш, маънавий-маърифий ишларни тизимли йўлга қўйиш ҳамда жамоаларда соғлом муҳитни шакллантириш бўйича топшириқлар берилди.
Қашқадарё вилояти ИИБ Ахборот хизмати