Ўзбекистон Республикаси Ички ишлар вазирлиги

Ўзбекистон Республикаси Ички ишлар вазирининг ўринбосари — Транспорт ва туризм объектларида хавфсизликни таъминлаш департаменти бошлиғи Баҳодир Мирзараҳимов томонидан Ўзбекистон Республикаси ИИВ Транспорт ва туризм объектларида хавфсизликни таъминлаш департаментининг Қорақалпоғистон Республикаси Транспортда хавфсизликни таъминлаш бошқармасида ўрганиш ишлари олиб борилди.

Ўрганиш давомида бошқармада хизмат олиб бораётган ходимлар учун яратилган шароитлар ва уларнинг хизмат фаолияти билан яқиндан танишди. Шунингдек, ходимларни Янги йил байрами муносабати билан самимий табриклади.

Шундан сўнг Қўнғирот темир йўл вокзалида фуқаролар учун яратилган шароитлар, поездлар ва вокзал ҳудудида хавфсизлик қоидаларига риоя этилиши ўрганилди. Ўрганишлар натижасида аниқланган камчиликларни бартараф этиш бўйича масъул раҳбарларга тегишли топшириқлар берилди.

Ушбу ўрганиш ишлари давомида вазир ўринбосари 27-сонли манзил колонияси ва Қонликўл тумани Ички ишлар бўлимида бўлиб, ушбу муассасаларнинг хизмат фаолияти билан яқиндан танишди.

Хусусан, 27-манзил колониясида маҳкумларни сақлаш шароитлари, уларнинг меҳнат билан бандлигини таъминлаш, ижтимоий мослашуви, шунингдек, хавфсизлик ва қонунчилик талабларига риоя этилиши масалалари атрофлича ўрганилди. Колония ходимларининг хизмат олиб бориш тартиби, хизмат интизоми, моддий-техник таъминоти ва инфратузилманинг ҳолати кўздан кечирилди.

Шунингдек, Қанликўл тумани Ички ишлар бўлимида жамоат хавфсизлигини таъминлаш, ҳуқуқбузарликларнинг олдини олиш, фуқаролар мурожаатлари билан ишлаш ҳамда профилактик тадбирларни ташкил этиш бўйича амалга оширилаётган ишлар таҳлил қилинди. Ходимларнинг хизмат фаолияти, иш жадвали, хизмат шароитлари ва мавжуд муаммолар юзасидан масъул раҳбарлар билан фикр алмашилди.

Ўрганиш якунлари бўйича аниқланган камчилик ва муаммоларни бартараф этиш, хизмат самарадорлигини янада ошириш, қонун устуворлигини таъминлаш ҳамда аҳоли билан ишлаш тизимини такомиллаштириш юзасидан тегишли кўрсатма ва тавсиялар берилди. Шу билан бирга, ички ишлар органлари фаолиятида замонавий ёндашувларни жорий этиш, ходимларнинг касбий салоҳиятини оширишга алоҳида эътибор қаратиш лозимлиги таъкидланди.