«E-material» ахборот тизими орқали рўйхатга олинган мурожаатлар билан ишлаш самарадорлигини ошириш масалалари бўйича ўқув машғулоти ўтказилди
2026-01-04 09:35:00 / Янгиликлар
Бухоро вилояти ИИБ бошлиғининг ўринбосари томонидан «E-material» электрон ахборот тизими орқали келиб тушаётган мурожаатларни кўриб чиқиш, уларнинг ижросини таъминлаш ҳамда қонуний қарорлар қабул қилиш ҳолати юзасидан хизмат йиғилиши ўтказилди.
Йиғилишда терговчилар, Ахборот маркази, штаб бошлиқлари, Ҳуқуқбузарликлар профилактикаси бўлими бошлиқлари, навбатчилик хизмати ходимлари, котибият ва мурожаатлар билан ишлаш инспекторлари, шунингдек, хотин-қизлар масалалари бўйича инспекторлар иштирок этди.
Таъкидланганидек, 2025 йил давомида вилоят ички ишлар органларига келиб тушган мурожаатларнинг 96,7 фоизи жиноят ва ҳодисаларга оид бўлиб, уларнинг асосий қисми «E-material» ахборот тизими орқали рўйхатга олинган. Хусусан, биргина декабрь ойида айрим ҳудудий бўлинмаларга кунига ўртача 40 тадан ортиқ мурожаат келиб тушганлиги қайд этилди.
Шунингдек, мурожаатлар билан ишлаш жараёнида айрим ходимларнинг Жиноят-процессуал кодексининг 329–330-моддалари, «Жисмоний ва юридик шахсларнинг мурожаатлари тўғрисида»ги Қонун ҳамда соҳага оид буйруқ ва қўшма қарорлар талабларига етарли даражада риоя қилмаётгани кўрсатиб ўтилди.
Йиғилиш давомида «E-material» тизими орқали рўйхатга олинган мурожаатларни махсус шаклдаги йиғма-жилдлар асосида юритиш («Жондор тажрибаси»), мурожаатлар ижроси устидан кундалик ва тизимли назорат ўрнатиш, ижро ва хизмат интизомини мустаҳкамлаш бўйича масъулларга аниқ вазифалар ва топшириқлар белгилаб берилди.
Якунда мурожаатлар билан ишлашда қонунийлик, шаффофлик ва масъулиятни янада кучайтириш, фуқароларнинг мурожаатлари ўз вақтида ва сифатли ҳал этилишини таъминлаш устувор вазифа эканлиги алоҳида қайд этилди.