ИИВ раҳбарияти Метрополитенда хавфсизликни таъминлаш бошқармасига ташриф буюрди
2025-12-30 17:10:00 / Янгиликлар
Ташриф давомида метрополитен объектларида жамоат хавфсизлигини таъминлаш, фуқароларнинг тинч ва осойишта ҳаракатланиши учун яратилган шарт-шароитлар, шунингдек, хизмат олиб бораётган ходимларнинг кундалик фаолияти билан яқиндан танишилди.
Вазир ўринбосари генерал-майор Баходир Мирзарахимов хавфсизликни таъминлашда замонавий технологиялардан фойдаланиш, видеокузатув тизимларининг самарадорлиги ҳамда тезкор хизматларнинг ўзаро ҳамкорлиги масалаларига алоҳида эътибор қаратди.
Шунингдек, профилактик тадбирларни янада кучайтириш, хизмат интизомини мустаҳкамлаш, қонун устуворлигини таъминлаш ҳамда фуқаролар билан мулоқот маданиятини юксалтириш бўйича тегишли вазифалар белгилаб берилди. Ходимларнинг касбий салоҳиятини ошириш ва хизмат фаолияти самарадорлигини юксалтириш масалалари муҳокама қилинди.
Ташриф якунида ИИВ ўринбосари генерал-майор Баходир Мирзарахимов метрополитенда хавфсизликни таъминлаш соҳасида хизмат олиб бораётган шахсий таркибни кириб келаётган Янги йил байрами билан табриклаб, уларга масъулиятли хизмат фаолиятида муваффақиятлар, мустаҳкам соғлик ҳамда тинчлик-осойишталик тилади. Шунингдек, у жамоат хавфсизлигини таъминлаш бўйича белгиланган вазифаларни сўзсиз ва сифатли ижро этиш муҳим аҳамият касб этишини таъкидлади.
Транспорт ва туризм объектларида хавфсизликни таъминлаш департаменти Ахборот хизмати