Ўзбекистон Республикаси Ички ишлар вазирлиги

Жорий йилнинг 28 декабрь куни Хоразм вилояти Ички ишлар бошқармаси бошлиғи, полковник Абдумажид Шермухамедов томонидан фуқароларнинг мурожаатларини жойида ўрганиш, уларни қийнаётган муаммоларга ўз вақтида ва қонуний ечим топиш, шунингдек аҳоли билан очиқ ва самарали мулоқотни йўлга қўйиш мақсадида Хива шаҳрида жойлашган Хавфсиз туризмни таъминлаш бошқармаси биносида навбатдаги сайёр қабул ташкил этилди.

Сайёр қабул давомида фуқаролар томонидан ички ишлар органлари фаолиятига бевосита дахлдор бўлган, шунингдек ижтимоий, ҳуқуқий, маъмурий ва меҳнат муносабатларига оид масалалар юзасидан бир қатор мурожаатлар билдирилди. Хусусан, жиноят ишларини кўриб чиқишдаги айрим ҳолатлар, фуқаролик-ҳуқуқий низолар, меҳнат муносабатларида юзага келаётган муаммолар, жамоат тартибини таъминлаш, профилактика инспекторлари фаолиятини такомиллаштириш масалалари фуқаролар томонидан кенг кўтарилди.

Хоразм вилояти ИИБ бошлиғи ҳар бир мурожаатни алоҳида эътибор билан тинглаб, фуқароларнинг мурожаатларига нисбатан холис ва масъулиятли ёндашувни таъминлади. Қатор масалалар бўйича мурожаатчиларга жойида ҳуқуқий тушунтиришлар берилди, айрим муаммолар эса тегишли хизмат ва бўлинмалар иштирокида бевосита ҳал этилиши белгиланди. Қўшимча ўрганиш ва амалий чора кўришни талаб этган мурожаатлар юзасидан масъул раҳбар ва ходимларга аниқ вазифалар юклатилиб, уларнинг ижроси қатъий назоратга олинди.

Шу билан бирга, сайёр қабул жараёнида ҳудуддаги ижтимоий муҳит, аҳолининг турмуш тарзи, жамоат хавфсизлигини таъминлаш ҳамда ҳуқуқбузарликларнинг барвақт олдини олиш борасида амалга оширилаётган профилактик тадбирлар ҳолати ҳам атрофлича муҳокама қилинди. Бу борада тегишли хизматлар олдига профилактика ишларини янада кучайтириш, фуқаролар билан доимий мулоқотни йўлга қўйиш бўйича қатор вазифалар қўйилди.

Таъкидлаш жоизки, ички ишлар органлари томонидан аҳоли мурожаатлари билан ишлаш, фуқаролар муаммоларини жойида ҳал этиш, очиқлик ва шаффофликни таъминлаш давлат сиёсати даражасида устувор вазифалардан бири ҳисобланади. Шу каби сайёр қабуллар эса аҳолининг давлат органларига бўлган ишончини мустаҳкамлаш, муаммоларни ўз вақтида бартараф этиш ҳамда жиноятчиликка қарши кураш ва профилактика ишлари самарадорлигини оширишга хизмат қилади.

Мазкур сайёр қабул фуқароларга амалий ёрдам кўрсатиш, мурожаатларни тезкор ва сифатли ҳал этиш, шунингдек аҳоли ва ички ишлар органлари ўртасидаги ўзаро ҳамкорликни янги босқичга олиб чиқишда муҳим аҳамият касб этди.

Хоразм вилояти ИИБ Ахборот хизмати