Халқ билан мулоқот: Жазони ижро этиш департаментида навбатдаги сайёр қабул ўтказилди
2025-12-27 17:40:00 / Янгиликлар
Фуқаролар мурожаатлари билан ишлаш самарадорлигини янада ошириш, аҳоли розилигига эришиш ва жамиятда очиқликни таъминлаш мақсадида жорий йилнинг 25 декабрь куни Тошкент вилояти Зангиота туманидаги “Садоқат” боғи маънавият марказида жазони ижро этиш тизимига оид масалалар бўйича навбатдаги кенг қамровли сайёр қабул ташкил этилди. Тадбирда Жазони ижро этиш департаменти раҳбарияти иштирок этиб, фуқароларнинг мурожаатларини шахсан тинглади.
Сайёр қабулга жами 123 нафар фуқаро ташриф буюрди, улардан 106 нафари Жазони ижро этиш департаменти раҳбариятига ўз мурожаатларини тақдим этди. Мурожаатлар мазмун жиҳатдан турлича бўлиб, асосан маҳкумларни яшаш манзилига яқин муассасаларга ўтказиш, жазони енгилроғига алмаштириш, уларнинг соғлиғига доир муаммолар ва афв этиш каби масалаларни қамраб олди.
Энг муҳими, мурожаатларнинг 35 фоизи тезкор тарзда жойида ҳал этилди. Фуқаролар ўзларини қийнаётган масалалар бўйича аниқ, ҳуқуқий асосланган жавоб олдилар. Қолган 65 фоиз мурожаат эса комплекс ўрганиш ва соҳавий идоралар билан ҳамкорликда чоралар кўрилишини талаб этиши туфайли назоратга олинди. Уларни ҳал этиш бўйича масъул раҳбарларга аниқ вазифалар юклатилди.
Бундай сайёр қабуллар халқ билан мулоқотни янада мустаҳкамлаш, фуқаролар ишончини ошириш ва муаммоларни жойида ҳал этиш орқали амалий натижаларга эришишда муҳим аҳамият касб этмоқда.
ИИВ ҳузуридаги Жазони ижро этиш департаменти