Сурхондарё вилояти ички ишлар бошқармасида ёш ходимлар ота-оналари билан учрашув ўтказилди
2025-12-25 11:35:00 / Янгиликлар
Сурхондарё вилояти Ички ишлар бошқармасида Ўзбекистон Республикаси Ички ишлар вазирлиги Малака ошириш институтининг Бошланғич касбий тайёргарлик курсини муваффақиятли тамомлаб келган ёш ходимлар ҳамда уларнинг ота-оналари билан учрашув бўлиб ўтди.
Мазкур курсни сурхондарёлик жами 59 нафар ходим тамомлаб, ички ишлар органлари хизматига қабул қилинди. Улардан 21 нафари офицерлик, 38 нафари сафдорлик лавозимларига тайинланиши белгиланган.
Учрашувда Сурхондарё вилояти ИИБ бошлиғи ўринбосари подполковник Завқиддин Хўжанов ҳамда ИИВ Шахсий хавфсизлик бош бошқармаси Сурхондарё вилояти бўйича бошқармаси бошлиғи подполковник Содиқжон Сафаровлар иштирок этди.
Таъкидланганидек, бошланғич касбий тайёргарлик курсини тамомлаган ходимлар тегишли буйруқлар асосида лавозимларга тайинланади ҳамда уларга ички ишлар органларида камида беш йил хизмат стажига эга бўлган тажрибали ходимлар мураббий сифатида бириктирилади. Мураббийлик тизими ёш ходимларнинг хизматга мослашуви ва касбий шаклланишини таъминлашга қаратилган.
Шунингдек, учрашув давомида ички ишлар органларида хизмат қилиш шартлари, ойлик иш ҳақи, хизмат стажига қараб бериладиган устамалар, аттестация тартиби ҳамда ходимлар ва уларнинг оила аъзолари учун белгиланган ижтимоий имтиёзлар ҳақида ҳам маълумотлар берилди.
Учрашув очиқ мулоқот тарзида ўтиб, ёш ходимларнинг келгуси хизмат фаолиятида масъулият ва касбий садоқатни янада оширишга хизмат қилди.
Сурхондарё вилояти ИИБ Ахборот хизмати