Ўзбекистон Республикаси Ички ишлар вазирлиги

Мамлакатимизда кейинги йилларда хотин-қизларнинг ҳуқуқ ва манфаатларини, гендер тенглигини таъминлаш, оила, оналик ва болаликни ҳимоя қилиш давлат сиёсатининг устувор йўналишига айланди. Бунга жавобан, хотин-қизларнинг ижтимоий-сиёсий жараёнлардаги иштироки тобора ортиб бормоқда.

ИИВ 1-сонли Тошкент академик лицейида пойтахт ИИББ соҳавий хизматлар вакиллари ҳамда мазкур таълим муассасаси ўқувчи қизлари иштирокида бўлиб ўтган давра суҳбатида бу борада атрофлича сўз юритилди. Тадбирда хотин-қизларга нисбатан зўравонликнинг олдини олиш, мавсумий юқумли касалликлар, ИИВнинг олий таълим муассасаларига ўқишга кириш учун ҳарбий-тиббий комиссияда тиббий гувоҳлантиришдан ўтиш тартиби, ички ишлар органларида ходималарга кўрсатилаётган эътибор ва яратилган шарт-шароитлар, кибермаданиятни юксалтириш мавзулари юзасидан маърузалар тингланди.

- Бош бошқарма ва унинг тизимларида эркаклар билан бир сафда, бир мақсад йўлида садоқат ва фидойилик билан хизмат олиб бораётган аёллар улуши тобора ортяпти, — дейди Тошкент шаҳар ИИББ ҲПБ бошлиғининг ўринбосари, подполковник Ширин Норматова. — Бу, аввало, Юртбошимиз раҳнамолигида жамиятнинг барча жабҳаларида хотин-қизларимизнинг ўрни ва ролини оширишга қаратилаётган эътиборнинг маҳсулидир. Қолаверса, ички ишлар органларидек масъулияти оғир соҳада уларнинг самарали фаолият юритиши учун ишонч билдириш, имконият ва шароит яратиш, ҳар томонлама қўллаб-қувватлаш, имкониятларини юзага чиқаришга кўмаклашиш борасида тизимли чора-тадбирлар олиб борилмоқда.

Шунингдек, очиқ мулоқот тарзида ўтган тадбирда иштирокчи ёшларга инсон қизиққан соҳасида ўз қобилиятини юзага чиқариши учун ўқиш-ўрганишдан ва изланишдан тўхтамаслиги кераклиги уқтирилди. Ҳаётдаги қийинчиликлардан чўчимай, билмаганларини устозларидан, ҳамкасбларидан сўраб, ўз бурчини сидқидилдан адо этишга киришганлар барча соҳаларда бўлгани каби, ички ишлар органлари тизимида ҳам кўзлаган мақсадларига эришиши таъкидланди.

Гулноза ТУРҒУНБОЕВА, ўз мухбиримиз.
Тошкент шаҳри.