Бухоро вилоятида байрам тадбирларининг тинч, осойишта ва хавфсиз ўтишини таъминлаш мақсадидаги ўрганишлар Ғиждувон ва Шофиркон туманларида давом этди
2025-12-23 13:50:00 / Янгиликлар
Вилоят ҳокими Ботир Зарипов бошчилигидаги вилоят прокурори, вилоят Ички ишлар бошқармаси бошлиғи ҳамда ҳуқуқни муҳофаза қилувчи органлар раҳбарлари Ғиждувон туманида бўлиб, Янги йил арчаси ўрнатилган ҳудудларда ёнғин ва жамоат хавфсизлиги талабларига қай даражада тайёргарлик кўрилганлигини ўргандилар.
Ўрганиш жараёнида байрам тадбирларини тинч, осойишта ва хавфсиз ўтказиш масалалари муҳокама қилиниб, тегишли соҳа масъулларига аниқ топшириқ ва кўрсатмалар берилди.
Шунингдек, ташриф давомида Абдухолиқ Ғиждувоний зиёратгоҳида амалга оширилаётган ободонлаштириш ишлари кўздан кечирилди. Ҳудудда дарахт кўчатлари экилиб, Қуръон тиловат қилинди. Келаётган Янги йил юртимизда тинчлик-осойишталик барқарор бўлиши, қут-барака ва фаровонлик янада зиёда бўлиши тилаб, эзгу дуолар қилинди.
Байрам тадбирларининг тинч, осойишта ва хавфсиз ўтишини таъминлашга қаратилган ўрганиш ишлари Шофиркон туманида давом эттирилди. Ўрганиш жараёнида байрам майдонининг махсус тўсиқлар билан ўраб олинганлиги, кириш ва чиқиш жойлари тартибга солинганлиги, хавфсизлик чораларининг кучайтирилганлиги, шунингдек, ёнғин ва жамоат хавфсизлиги талабларига риоя этилиши ҳолати кўздан кечирилди. Тадбирлар давомида юзага келиши мумкин бўлган фавқулодда ҳолатларнинг олдини олиш масалаларига алоҳида эътибор қаратилди.
Ҳамкорликдаги хизматларга доимий назоратни кучайтириш, аҳоли хавфсизлигини таъминлаш ҳамда байрам тадбирларини юқори савияда ташкил этиш юзасидан аниқ вазифалар белгилаб берилди. Шу билан бирга, масъулларга аҳолига байрам кайфиятини улашувчи маданий-кўнгилочар дастурларни кўпайтириш ҳамда арзонлаштирилган савдо ярмаркаларини ташкил этиш бўйича топшириқ ва кўрсатмалар берилди.
Бухоро вилояти ИИБ Ахборот хизмати