Бухоро вилояти раҳбарияти Қоровулбозор, Бухоро ва Вобкент туманларида Янги йил байрамини хавфсиз ўтказиш масалаларини ўрганди
2025-12-23 11:15:00 / Янгиликлар
Бухоро вилояти ҳокими бошчилигидаги вилоят прокурори, вилоят Ички ишлар бошқармаси бошлиғи ҳамда ҳуқуқни муҳофаза қилувчи органлар раҳбарлари Қоровулбозор, Бухоро ва Вобкент туманларида бўлиб, Янги йил байрамини кутиб олишга кўрилаётган тайёргарлик ишлари билан танишдилар.
Ташриф Қоровулбозор туманидан бошланиб, ушбу ҳудуддаги туман техникуми фаолияти ўрганилди. Масъуллар ўқув-ишлаб чиқариш устахоналарини кўздан кечириб, педагоглар ва ўқувчи-ёшлар билан мулоқот қилдилар. Ёшларнинг илмга ва касб-ҳунарга бўлган қизиқишлари ўрганилиб, мазкур таълим муассасаси мисолида вилоятда ёшларга оид давлат сиёсатини амалга ошириш бўйича устувор вазифалар белгиланди.
Шунингдек, Қоровулбозор, Бухоро ва Вобкент туманларида «Янги йил арчаси» ўрнатилган ҳудудларда байрам тадбирларининг тинч, осойишта ва хавфсиз ўтишини таъминлашга қаратилган ўрганиш ишлари олиб борилди.
Ўрганиш жараёнида байрам майдонларининг махсус тўсиқлар билан ўраб олинганлиги, кириш ва чиқиш йўлаклари тартибга солинганлиги, хавфсизлик чораларининг кучайтирилганлиги, шунингдек, ёнғин ва жамоат хавфсизлиги талабларига риоя этилиши ҳолати кўздан кечирилди. Фавқулодда ҳолатларнинг олдини олиш масалаларига алоҳида эътибор қаратилди.
Ҳамкорликдаги хизматларга доимий назоратни кучайтириш, аҳоли хавфсизлигини таъминлаш ҳамда байрам тадбирларини юқори савияда ташкил этиш юзасидан аниқ вазифалар белгилаб берилди. Шу билан бирга, туман масъулларига аҳолига байрам кайфиятини улашувчи маданий дастурларни кўпайтириш ҳамда арзонлаштирилган савдо ярмаркаларини ташкил этиш бўйича топшириқ ва кўрсатмалар берилди.
Бухоро вилояти ИИБ Ахборот хизмати