“Қамчиқ” довонида йўл ҳаракати хавфсизлигини таъминлаш чоралари кўздан кечирилди
2025-12-18 11:25:00 / Янгиликлар
ИИВ ЖХД Йўл ҳаракати хавфсизлиги хизмати раҳбари “Қамчиқ“ довонида амалий ташриф билан бўлди. Дастлаб ЙҲХХ раҳбари “Чинор“ ЙПХ масканида ўрнатилган кузатув камераларининг интеграция ҳолатини кўздан кечириб, ходимларнинг хизмат олиб бориш жараёни билан яқиндан танишди.
Шунингдек, “Қамчиқавтойўл ИЙФК” ДМ ҳамда ободонлаштириш хизмати ходимлари билан суҳбат ўтказилиб, мавжуд махсус техникаларнинг техник ҳолати кўздан кечирилди. Қишки мавсум учун мўлжалланган қум-туз аралашмаси захираси етарли эканлиги текширилди.
Ташриф давомида А-373 автомобиль йўлининг 106–108-километрлари оралиғида олиб борилаётган таъмирлаш ишлари билан танишилиб, йўл ҳаракати хавфсизлигини таъминлашга қаратилган чора-тадбирлар муҳокама қилинди.
Шундан сўнг, “Наманган“ ЙПХ масканида юк автомобилларини кўрикдан ўтказиш учун мўлжалланган “рентген“ мосламаси ҳамда масканда ташкил этилган “қизил–яшил йўлак“ тизими фаолияти билан танишди. Бундан ташқари, Маъмурий амалиёт бўлимида хизмат жараёнлари, ходимлар учун яратилган шарт-шароитлар ўрганилиб, фуқаролар билан суҳбат ўтказилди.
Ташриф якунида ЙҲХХ раҳбари кучайтирилган хизматга жалб этилган шахсий таркиб иштирокида йўриқнома ўтказиб, хизматни ҳушёр ва сергак ҳолда олиб бориш, фуқаролар билан хушмуомалада бўлиш, қоидабузарликларнинг олдини олиш, шунингдек, пиротехника воситаларининг ноқонуний айланмасига қарши курашиш бўйича аниқ топшириқ ва кўрсатмалар берди.
ИИВ ЖХД ЙҲХХ Ахборот хизмати