Ўзбекистон Республикаси Ички ишлар вазирлиги ва Германия халқаро ҳамкорлик жамияти (GIZ) ўртасида ҳуқуқбузарликлар профилактикаси соҳасида ҳамкорлик масалалари муҳокама қилинди
2025-12-17 09:00:00 / Янгиликлар
2025 йил 15 декабрь куни Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати раҳбарияти ҳамда Германия халқаро ҳамкорлик жамияти (GIZ)нинг «Марказий Осиёда зўравон экстремизмнинг олдини олиш» лойиҳаси раҳбари Штефан Бухмаер билан учрашуви бўлиб ўтди.
Учрашувда ижтимоий профилактикани кучайтириш, вояга етмаганлар ўртасида жиноятчиликни олдини олиш бўйича халқаро тажрибалар, хотин-қизлар масалалари бўйича инспекторларни, инспектор-психологларни, Вояга етмаганларга ижтимоий-ҳуқуқий ёрдам кўрсатиш марказлари ходимларини халқаро экспертлар томонидан ўқитиш бўйича батафсил суҳбат олиб борилди.
Шу билан бирга, 2023 йил 11 апрель куни тасдиқланган «Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси Қонуни борасида фикр алмашилди.
Ички ишлар вазирлиги ва Германия халқаро ҳамкорлик жамияти (GIZ)нинг «Марказий Осиёда зўравон экстремизмнинг олдини олиш» лойиҳаси раҳбари билан ҳамкорлик қилиш учун иш режасини ишлаб чиқиш келишиб олинди.
ИИВ Жамоат хавфсизлиги департаменти Ахборот хизмати