«Хавфсиз ва соғлом юрт» тадбирлари доирасида қидирувда бўлган фирибгар Туркияда ушланди
2025-12-01 00:00:00 / Янгиликлар
«Хавфсиз ва соғлом юрт» кенг қамровли тезкор профилактик тадбирлари доирасида Ўзбекистон Республикаси Ички ишлар вазирлиги Тезкор-қидирув департаменти ҳамда мамлакатимизнинг Истанбул шаҳридаги Бош консулхонаси билан ҳамкорликда олиб борилган тезкор-қидирув тадбирлари натижасида Ўзбекистон Республикаси ЖКнинг 168-моддаси 4-қисмида назарда тутилган жиноятни содир этишда айбланган фуқаро Туркия Республикаси ҳудудида қўлга олинди.
1980 йилда туғилган мазкур шахс ўн нафардан ортиқ фуқарога юк ташувчи транспорт воситасини олиб беришни ваъда қилиб, фирибгарлик йўли билан жами 3 млрд 607 млн сўмдан ортиқ маблағни қўлга киритган.
2023 йилдан буён Юнусобод тумани ИИО ФМБ томонидан қидирувга эълон қилинган фуқаронинг Туркия Республикаси Истанбул шаҳрида яшириниб юргани аниқланиб, ўтказилган тезкор тадбирлар давомида қўлга олинди ва Ўзбекистонга қайтарилди.
ИИВ Тезкор-қидирув департаменти