Фарғона вилоятида Ички ишлар вазирлиги раҳбарияти раислигида жиноятларни барвақт олдини олиш, тергов сифатини ошириш борасида кўрилаётган чоралар муҳокама қилинди
2025-12-10 13:00:00 / Янгиликлар
Вазир ўринбосари полковник Р.Ашропов раислигида Фарғона вилояти ички ишлар бошқармасида йиғилиш ўтказилди.
Видеоконференция шаклида ташкил этилган йиғилишда вилоят ИИБ раҳбарияти, соҳавий хизмат масъуллари, ҳудудий ички ишлар органлари бошлиқлари, шахсий таркиби, тергов бўлинмалари бошлиқлари, суриштирувчи ва терговчилар иштирок этдилар.
Йиғилишда, жиноятчилик ва ҳуқуқбузарликларнинг олдини олиш юзасидан кўрилаётган чоралар муҳокама қилиниб, “маҳалла еттилиги”, ижтимоий профилактикага масъул идоралар фаолияти устидан кунлик назоратни кучайтириш, ижтимоий профилактика тизимининг субъектлари томонидан жиноятлар содир этилишининг барвақт олдини олиш юзасидан топшириқлар берилди, қайд этилган камчиликлар юзасидан масъулларнинг тушунтириш ва изоҳлари эшитилди.
Муҳокамада, тергов сифатини ошириш ва бу борада ёш ходимларнинг касбий маҳорати билим ва салоҳиятини ошириб бориш, суд органлари билан амалий ҳамкорликни янада яхшилаш ва соҳага оид бошқа йўналишларга ҳам эътибор қаратилди.
Амалиётда учраётган муаммоларни бартараф этиш бўйича мутасадди раҳбарлар олдига аниқ вазифалар белгилаб берилди.
Фарғона вилояти ИИБ Ахборот хизмати