Ўзбекистон Республикаси Ички ишлар вазирлиги

Жаҳон соғлиқни сақлаш ташкилоти ҳамда Бирлашган Миллатлар Ташкилоти Бош Ассамблеясининг 1988 йилдаги қарорига асосан, 1 декабрь санаси Бутунжаҳон ОИТСга қарши кураш куни сифатида белгиланган. Шу муносабат билан Ўзбекистон Республикаси Ички ишлар вазирлигининг Ихтисослаштирилган мактаб-интернатида жорий йилнинг 3 декабрь куни «Билим – ҳимоя, бефарқлик – хавф!» мавзусида маънавий-маърифий тадбир ўтказилди. Ушбу тадбирда мактаб-интернатининг педагог ходимлари, 8 ва 9-синф ўқувчилари ҳамда Тошкент шаҳар ОИТСга қарши кураш маркази Услубий профилактика ва эпидемияга қарши тадбирларни ташкил этиш бўлими мудири Зойиров Махаматжон Зойирович иштирок этди. ОИТС деб аталувчи даҳшатли касаллик эпидемиясининг тарқалиши ва шу кунгача давоси топилмаганлиги унинг ХХ аср вабоси деб аталишига сабаб бўлганлигини, бу иллат ХХИ асрда ҳам ўз ечимини топмаганлиги айтиб ўтилди. Шунингдек, тадбир давомида ОИТСнинг олдини олиш бўйича амалга оширилаётган ишлар, хавфсизлик чоралари ва профилактика ҳақида маълумот берилди.

Тадбир давомида ўқувчилар учун мавзуга оид видеолавҳа намойиши, интерактив савол-жавоблар, мунозаралар, психологик огоҳлик машғулотлари, ОИВнинг олдини олиш бўйича маъруза ва тавсиялар тақдим этилди. Шунингдек, ОИТСга қарши курашнинг жаҳон миқёсидаги аҳамияти, Ўзбекистон Республикасида ушбу йўналишда амалга оширилаётган чора-тадбирлар ҳақида маълумот берилди. Тадбирда мактаб-интернатнинг биология фани ўқитувчиси Халлиева Наргиза Исмаиловна томонидан «Ҳаёт дарахти» ва «Хавфсиз йўлни танла» интерактив ўйинлари ташкил этилди. Ўқувчилар ушбу ўйинларда фаол иштирок этишди ва мавзу юзасидан ўз фикр-мулоҳазаларини билдирдилар. Тадбир якунида ўқувчиларга профилактика бўйича эслатмалар, соғлом турмуш тарзига оид тавсиялар берилди.

Мазкур тадбир ўқувчиларда ОИВ/ОИТСга оид асосий тушунчаларни шакллантириш, ўз соғлигига масъулият билан ёндашиш, салбий оқибатларга олиб келувчи хатти-ҳаракатлардан узоқ бўлишга ундашга хизмат қилди.