Ўзбекистон Республикаси Ички ишлар вазирлиги

Наманган вилоятининг барча шаҳар ва туманларида ички ишлар органлари ходимларининг тунги хизмат фаолияти, шунингдек кундузги вақтларда маҳаллаларда амалга оширилаётган ишлар ўрганилиб, содир этилаётган жиноятлар тизимли равишда муҳокама қилиб борилмоқда.

Жумладан, Косонсой туманида туман ҳокими ва прокурори иштирокида ўтказилган комплекс ўрганишлар давомида дастлаб “Жар” маҳалласи профилактика инспекторининг фаолияти таҳлил қилиниб, йўл қўйилган камчиликлар юзасидан масъуллар қатъий огоҳлантирилди ва келгусида амалга оширилиши зарур бўлган чоралар белгилаб берилди. Шу билан бирга, туман ИИБ ҳамда у ерда ташкил этилган куз-қиш штаби фаолияти, “Соғлом ва хавфсиз юрт” кенг қамровли профилактик тадбирлари натижалари танқидий муҳокама қилиниб, масъул ходимларга аниқ вазифалар юклатилди.

Бундан ташқари, “Олмазор” маҳалласи ҳудудида содир этилган оила-турмуш доирасидаги оғир турдаги жиноятлар сабаблари чуқур таҳлил қилинди ва бу йўналишда маҳалла ҳамда туман ИИБ масъулларига тегишли топшириқлар берилди.

Шунингдек, Давлатобод туманида ўтказилган ўрганишлар давомида тунги хизмат фаолияти билан бир қаторда ижтимоий соҳа объектларининг қиш мавсумига тайёргарлиги ҳам кўриб чиқилди. Аввало, “Юксалиш” маҳалласидаги ҳуқуқ-тартибот маскани ходимларининг хизмат фаолияти таҳлил қилиниб, жиноятчиликни олдини олиш бўйича амалга оширилаётган ишлар муҳокама қилинди. Шунингдек, “Юксалиш”, “Тадбиркор”, “Орзу”, “Ижодкор”, “Елхон”, “Нуробод”, “Наврўз” ва “Гулшан” маҳаллаларида хизмат олиб бораётган тунги нарядларга йўриқнома ўтказилиб, хизматни самарали ташкил этиш юзасидан аниқ вазифалар белгилаб берилди.

Шундан сўнг, “Юксалиш” маҳалласидаги кўп қаватли уйларга хизмат кўрсатувчи бошқарув сервис компанияси фаолияти, “Тадбиркор” маҳалласидаги болалар шифохонасининг қиш мавсумига тайёргарлик ҳолати ва беморларга яратилган шарт-шароитлар ўрганилди. Мавсумни беталофат ўтказиш, аҳолининг мурожаатларига тезкор муносабат билдириш ва зарур чораларни кўриш юзасидан топшириқлар берилди.

Манзилли ўрганиш ва муҳокамалар Наманган вилоятининг барча туманларида босқичма-босқич давом эттирилмоқда.

Наманган вилояти ИИБ Ахборот хизмати