Бухоро вилояти ИИБ раҳбарияти томонидан Бухоро шаҳрида тунги фаолият, куз-қиш мавсумига тайёргарлик жараёнлари ўрганилди
2025-12-03 10:00:00 / Янгиликлар
Ўзбекистон Республикаси Президентининг 207-сонли фармонида белгиланган вазифалар ижросини таъминлаш, шунингдек 20 ноябрдан 20 декабргача республика бўйлаб ўтказилаётган «Хавфсиз ва соғлом юрт» тезкор-профилактика тадбирининг учинчи босқичи ҳамда вилоятда давом этаётган «Хавфсиз ҳудуд – долзарб 50 кунлик» махсус дастури доирасида Бухоро вилояти ҳокими бошчилигидаги ишчи гуруҳ томонидан қатор объектларда ўрганишлар ўтказилди.
Ушбу ўрганишларнинг асосий мақсади, халқ осойишталигини таъминлаш, жиноятчилик ва ҳуқуқбузарликларни олдини олиш, қиш мавсумида аҳолини энергия ресурслари билан барқарор таъминлаш, шу билан бирга энергетика корхоналарида юзага келиши мумкин бўлган ҳуқуқбузарликлар, талон-торож ҳолатлари ва бошқа хавф-хатарларнинг олдини олишдир. Шу муносабат билан ишчи гуруҳ томонидан энергетика объектларида хавфсизлик чораларининг реал ҳолати, фуқаролар мурожаатлари билан ишлаш тизими ҳамда қонунчилик талабларига риоя этилиши ҳолати ўрганилди.
Дастлаб, «Бухоро ҳудудий электр тармоқлари корхонаси» АЖнинг «Тезкор диспетчерлик хизмати» фаолияти кўздан кечирилди. Ҳудудларда электр энергиясидан ноқонуний фойдаланиш, трансформаторлар ва кабель тармоқларига тажовуз каби ҳолатларнинг олдини олиш бўйича масъулларга қатъий топшириқлар берилди. Шунингдек, аҳолининг мурожаатларини тезкор кўриб чиқиш ҳамда ҳуқуқбузарликлар оқибатида юзага келиши мумкин бўлган авариявий вазиятларнинг олдини олиш механизмлари муҳокама қилинди.
Кейинги манзил сифатида «Ҳудудгаз Бухоро» газ таъминоти филиали фаолияти ўрганилди. Газ тармоқларида ноқонуний уланишлар, талон-торож, газ баллонларидан носоз фойдаланиш оқибатида содир бўлиши мумкин бўлган хавфли ҳодисаларнинг олдини олиш масалалари кўриб чиқилди. Диспетчерлик хизмати ҳамда 24/7 ишлайдиган «Cалл-марказ»нинг аҳолига хизмат кўрсатиш сифати ҳам таҳлил қилиниб, муаммоли мурожаатлар бўйича аниқ чоралар белгиланди.
Ўрганишларнинг якуний босқичи «Бухороэнергомарказ» АЖда давом этди. Корхона томонидан кўп қаватли уйлар, аҳоли хонадонлари ва ижтимоий объектларга иссиқлик энергияси етказиб бериш жараёни ўрганилиб, тизимдаги узилишлар, техник камчиликлар ва эҳтимолий хавф омиллари бўйича масъулларга топшириқлар берилди.
Корхонада иссиқлик тармоқларига ноқонуний уланишларнинг олдини олиш, иссиқлик энергиясини талон-торож қилинишига йўл қўймаслик ва истеъмолчиларга сифатли хизмат кўрсатиш бўйича зарур чора-тадбирлар белгилаб берилди.
Ишчи гуруҳ томонидан барча объектларда хавфсизликни кучайтириш, қиш мавсумида ресурслар билан барқарор таъминлаш, жиноят ва ҳуқуқбузарликларнинг олдини олиш ҳамда аҳолига сифатли хизмат кўрсатишни таъминлаш бўйича тегишли топшириқ ва кўрсатмалар берилди.
Бухоро вилояти ИИБ Ахборот хизмати