Хоразм вилояти ИИБ раҳбарияти томонидан аҳоли мурожаатларини ўрганиш мақсадида сайёр қабул ўтказилди
2025-12-01 09:00:00 / Янгиликлар
Хоразм вилояти Ички ишлар бошқармаси бошлиғи, полковник Абдумажид Шермухамедов томонидан фуқароларнинг мурожаатларини жойида ўрганиш, уларни қийнаётган масалаларга амалий ечим топиш ва аҳоли билан очиқ мулоқотни йўлга қўйиш мақсадида Хива шаҳрида жойлашган Хавфсиз туризмни таъминлаш бошқармаси биносида навбатдаги сайёр қабул ўтказилди.
Қабул давомида фуқаролар томонидан турли соҳаларга оид — ҳуқуқий, ижтимоий, маъмурий ва ички ишлар органлари фаолияти билан боғлиқ масалалар юзасидан бир қатор мурожаатлар билдирилди.
Мурожаатлар орасида жиноят ишларини кўриб чиқиш, фуқаролик-ҳуқуқий низолар, меҳнат муносабатлари, жамоат тартибини таъминлаш ҳамда профилактика инспекторлари фаолиятига оид масалалар алоҳида ўрин тутди.
Бошқарма бошлиғи ҳар бир мурожаатни синчиклаб тинглаб, фуқароларга жойида ҳуқуқий тушунтиришлар берди. Қўшимча ўрганиш ва амалий чора кўришни талаб этган масалалар тегишли раҳбар ва масъул ходимларга юклатилиб, ижроси қатъий назоратга олинди.
Мазкур сайёр қабул фуқароларга амалий ёрдам кўрсатиш, мурожаатларни тез ва самарали ҳал этиш, шунингдек аҳоли ва ички ишлар органлари ўртасидаги очиқ мулоқотни мустаҳкамлашда муҳим аҳамият касб этди.
Хоразм вилояти ИИБ Ахборот хизмати