Ўзбекистон Республикаси Ички ишлар вазирлиги

Маълумки, Давлатимиз раҳбари томонидан белгилаб берилган устувор вазифалардан бири — аҳоли билан очиқ ва самарали мулоқотни йўлга қўйишдир.

Бугунги кунда бу тамойил барча давлат органлари фаолиятида асосий мезон сифатида мустаҳкамланиб бормоқда. Шу муносабат билан жорий йилнинг 30 ноябрь куни Ички ишлар вазирлиги масъул раҳбарлари иштирокида фуқаролар билан шахсий қабул ташкил этилди.

Қабул давомида вазирлик тизими фаолиятига оид турли йўналишлар бўйича жами 592 та мурожаат келиб тушди. Мурожаатлар билан ишлаш жараёнида нафақат мавжуд муаммоларни ўрганиш, балки аҳоли реал эҳтиёжларини аниқлаш, муаммоларнинг келиб чиқиш сабабларини таҳлил қилиш ва уларни тизимли ҳал этишга алоҳида эътибор қаратилди.

Мазкур мурожаатларнинг 285 таси (48%) тезкор тарзда, ҳуқуқий асослар билан ижобий ҳал этилди. Қолган 307 та мурожаат (52%) бўйича эса қўшимча ўрганиш ва соҳавий органлар билан ҳамкорликда чоралар кўриш талаб этилгани боис, улар назоратга олиниб, ижроси бўйича масъулларга аниқ топшириқлар юклатилди.

Шу билан бирга, Қорақалпоғистон Республикаси Ички ишлар вазирлиги, Тошкент шаҳри, Тошкент вилояти ички ишлар бош бошқармалари ҳамда вилоятлар ички ишлар бошқармалари раҳбарлари томонидан жойларда ўтказилган шахсий қабуллар давомида 397 та мурожаат қабул қилинди. Уларнинг 155 таси (39%) қабул жараёнидаёқ ижобий ҳал этилди, 242 та мурожаат (61%) эса қўшимча ўрганиш ҳамда назорат асосида ҳал этилиши учун юборилди.

Ички ишлар органларининг барча даражадаги раҳбарлари томонидан шахсий ва сайёр қабуллар ўтказиш, фуқаролар мурожаатларини ўрганиш ва ҳал этиш амалиёти мамлакатнинг барча ҳудудларида изчил давом этмоқда. Бу, ўз навбатида, аҳоли ишончини мустаҳкамлаш, давлат органлари очиқлиги ва жавобгарлигини таъминлашда муҳим қадам бўлиб хизмат қилмоқда.