Наманган вилояти ИИБ раҳбариятининг навбатдаги комплекс ўрганиш ишлари Мингбулоқ туманида давом эттирилди
2025-11-30 11:00:00 / Янгиликлар
Бошқарма раҳбариятининг тизимли равишда олиб бораётган ўрганиш ишлари натижасида маҳаллаларда хавфсиз муҳитни мустаҳкамлаш, криминоген вазиятни барқарор сақлаш ва жиноятчиликнинг олдини олиш бўйича амалга оширилаётган чора-тадбирларнинг самарадорлиги ортиб бормоқда.
Хусусан, Мингбулоқ туманида ўтказилган ўрганишлар давомида дастлаб туман марказида хизмат олиб бораётган тунги нарядларга йўриқнома ўтказилиб, ходимларга хизматни самарали ташкил этиш бўйича тегишли кўрсатмалар берилди.
Шунингдек, «Ойбек» маҳалласи профилактика инспекторининг фаолияти ўрганилиб, ўтган давр мобайнида жиноятчиликнинг олдини олиш борасида амалга оширган ишлари муҳокама қилинди ва мавжуд камчиликларни бартараф этиш бўйича топшириқлар берилди.
Бундан ташқари, туман электр тармоқлари корхонасининг қиш мавсумига тайёргарлик жараёни, техника воситалари ва эҳтиёт қисмларнинг созлиги кўздан кечирилди. Аҳолига етказиб берилаётган электр энергиясининг узлуксизлигини таъминлаш борасидаги мутахассисларнинг ахборотлари тингланди.
Шу билан бирга, 14-сонли мактабнинг иситиш тизими, синф хоналарида яратилган шароитлар ва ўқувчиларнинг таълим олишига қулай имкониятлар кўздан кечирилиб, масъул раҳбарларга аниқланган масалалар бўйича тегишли топшириқлар берилди.
Бундай комплекс ўрганишлар вилоят миқёсида изчил ва узлуксиз давом эттирилади.
Наманган вилояти ИИБ Ахборот хизмати