Ўзбекистон Республикаси ИИВ Эксперт-криминалистика бош маркази томонидан дронлар ва 3D- сканерлаш ёрдамида замонавий хариталаш усуллари жорий этилмоқда
2025-11-29 16:00:00 / Янгиликлар
Бирлашган Миллатлар Ташкилотининг Наркотиклар ва жиноятчилик бўйича бошқармаси (UNODC) Ўзбекистон Республикаси Ички ишлар вазирлигининг Бош эксперт-криминалистика маркази билан ҳамкорликда АҚШнинг Тошкент шаҳридаги элчихонасининг Наркотикларга қарши курашиш ва ҳуқуқни муҳофаза қилиш бўйича халқаро масалалар бўлими (INL) молиявий кўмагида “Воқеа жойларини кўриш учун дронлар ва 3D-сканерлаш ёрдамида хариталаш усуллари“ мавзусида семинар-тренингни муваффақиятли ўтказди.
Тадбир Бўстонлиқ туманидаги “Олмос“ конгресс марказида бўлиб ўтди.
Тренингда ИИВ Эксперт-криминалистика бош маркази ва Ўзбекистон Республикаси Адлия вазирлиги ҳузуридаги Х.Сулаймонова номидаги Республика суд экспертизаси маркази мутахассислари иштирок этди.
Семинар криминалистларнинг ҳодиса жойидаги вазиятни ҳужжатлаштириш ва таҳлил қилиш учун замонавий технологиялар – учувчисиз учиш аппаратлари (УУА) ва 3D-сканерлашдан фойдаланиш бўйича касбий кўникмаларини оширишга қаратилган.
Иштирокчилар учувчисиз учиш аппаратларидан фойдаланишнинг меъёрий ва техник жиҳатлари, шу жумладан хавфсизлик протоколлари, парвоздан олдинги текширувларни ва парвозларни оптимал бажариш учун атроф-муҳитни баҳолашни ўргандилар.
Тренинг давомида эксперт-криминалистлар суд-экспертиза ва ҳуқуқни муҳофаза қилиш соҳасида 3D-сканерлар ва учувчисиз учиш аппаратларидан фойдаланишнинг кенгайтирилган имкониятлари ва усулларидан фойдаланиш бўйича назарий билим ва амалий кўникмаларга эга бўлдилар.
Иштирокчилар ички ва мураккаб саҳналар учун 3D-лазер сканерлашнинг асосий усулларини, ортомозаик хариталар ва 3D моделларни яратишни ўзлаштирдилар, жиноий адлия эҳтиёжлари учун аниқ схемалар, анимациялар ва жиноят жойларини реконструкция қилиш учун махсус дастурий таъминотдан фойдаланган ҳолда 2D/3D маълумотларни интегратсиялаш ва таҳлил қилишни ўргандилар.
Ушбу тренингнинг ўтказилиши миллий эксперт муассасаларининг замонавий криминалистик технологияларни қўллаш бўйича салоҳиятини мустаҳкамлашда муҳим қадам бўлди, бу эса тергов сифати ва ҳуқуқни муҳофаза қилиш органлари ишининг самарадорлигини оширишга хизмат қилади.
ИИВ Эксперт-криминалистика бош маркази