Ўзбекистон Республикаси Ички ишлар вазирлиги

Бухоро вилояти ИИБ ҳамда ИИВ Академияси раҳбарияти томонидан Ўзбекистон Республикаси Президентининг 2025-йил 3-январдаги ПҚ–1-сонли “2025-йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижросини таъминлаш доирасида амалга оширилаётган ишлар юзасидан кенг қамровли йиғилиш ўтказилди.

Шунингдек, йиғилишда Ўзбекистон Республикаси Президентининг 2025-йил 18-августдаги ПҚ–253-сонли қарорида белгиланган вазифаларга мувофиқ “қизил” тоифага ажратилган маҳаллаларни хавфсиз ҳудудга айлантириш бўйича олиб борилаётган тажриба ва амалиётлар муҳокама қилинди.

Тадбирда Ички ишлар вазирлиги академияси профессор-ўқитувчилари иштирок этиб, “С. Айний” маҳалласида синовдан ўтказилган “Хабардор 24/7” мобил иловасини вилоят миқёсида жорий этиш, “А. Дониш” маҳалласида қўлланган ёндашув асосида талабалар ўртасида ижтимоий профилактикани кучайтиришга қаратилган “Хавфсиз олий таълим муассасаси” тамойилини босқичма-босқич татбиқ этиш, “Шайх-ул Олам” маҳалласида синовдан ўтган “Гео-электрон криминоген харита” мобил иловасини кенг кўламда қўллаш, “Памўза” маҳалласи тажрибасига таянган ҳолда ҳуқуқбузарликларни келтириб чиқарувчи омилларни мунтазам ҳисобга олиш ва мониторинг қилиш тизимини йўлга қўйиш каби бир қатор инновацион тажрибалар тақдимоти билан чиқиш қилдилар.

Йиғилишда, шунингдек, маҳаллаларда олиб борилаётган камераллаштириш ишлари, аҳолини рўйхатга олиш жараёнлари, ИТ технологиялари асосида бошқарув тизимини такомиллаштириш ва “қизил” тоифа маҳаллаларни изчил равишда “сариқ”, кейинчалик эса “яшил” тоифага ўтказиш бўйича режалар муҳокама этилди.

Йиғилишнинг иккинчи қисмида, Ўзбекистон Республикаси Президентининг 207-сонли фармонида белгиланган вазифалар асосида жорий йилнинг 20-ноябридан 20-декабрига қадар республика бўйлаб ўтказилаётган “Хавфсиз ва соғлом юрт” кенг қамровли тезкор-профилактика тадбирининг учинчи босқичи ҳамда вилоятда амалга оширилаётган “Хавфсиз ҳудуд – долзарб 50 кунлик” махсус тадбир доирасида бажарилаётган ишлар танқидий руҳда кўриб чиқилди.

Шу билан бирга, ички ишлар органлари тизимида рақамлаштириш жараёнлари, олиб борилаётган қурилиш ва таъмирлаш ишлари, шунингдек, волейбол ҳамда аралаш жанг санъати спорт турларини оммалаштириш бўйича амалга оширилаётган чора-тадбирлар юзасидан ҳам муҳокамалар ўтказилиб, масъулларга тегишли топшириқлар берилди.

Йиғилиш якунида, олий таълим муассасалари талабаларини вақтинчалик рўйхатга қўйиш тартибини такомиллаштириш, хавфсизликни янада кучайтириш мақсадида “С. Айний” маҳалласига қўшимча куч ва воситалар жалб этиш, тажрибавий лойиҳаларни бошқа ҳудудларга ҳам босқичма-босқич татбиқ этиш каби келгусида амалга оширилиши лозим бўлган бир қатор устувор вазифалар белгилаб олинди.

Бухоро вилояти ИИБ Ахборот хизмати