Ўзбекистон Республикаси Ички ишлар вазирлиги

“Халқаро аёлларга нисбатан зўравонликка барҳам бериш куни” муносабати билан Ички ишлар вазирлиги Маданият саройида Тошкент шаҳар ИИББ ташаббуси билан “Биз зўравонликка қаршимиз” шиори остида тадбир бўлиб ўтди.

Унда пойтахт ИИББ раҳбарияти, Оила ва хотин-қизлар қўмитаси Тошкент шаҳар бошқармаси, пойтахт туманлари ҳоким ўринбосарлари, ҳудудий тузилмалар масъуллари, хотин-қизлар масалалари бўйича катта инспекторлар, маҳалла хотин-қизлар фаоллари ва бошқа ташкилотлар мутасаддилари иштирок этишди.

Тадбирда қайд этилганидек, бугунги кунда хотин-қизларимизнинг ҳуқуқ ва манфаатларини таъминлашга бўлган эътибор давлат сиёсати даражасига кўтарилган. Бу йўналишда Президентимиз ҳамда Вазирлар Маҳкамаси томонидан қабул қилинаётган қатор қонун, фармон ва қарорлар ўз самарасини бермоқда.

Ушбу меъёрий ҳужжатлар асосида аёлларимизни ҳар томонлама қўллаб-қувватлаш, тазйиқ ва зўравонликдан жабрланган хотин-қизларга ижтимоий, ҳуқуқий, тиббий хизматлар кўрсатиш тизими яратилган. “Инсон” ижтимоий маркази, Оила ва хотин-қизлар бошқармалари, соҳавий хизматлар, маҳалла еттилиги ҳамкорлигида самарали ишлар олиб борилмоқда.

Бу жараёнлардан мақсад, жамиятимизда зўравонликка, тазйиққа қарши курашиш, хотин-қизларнинг ҳуқуқ ва эркинликларини ҳимоялаш, оилада аёлга нисбатан ҳурмат, меҳр-муҳаббат туйғусини шакллантириш, хотин-қизларимизни жамиятдаги фаол иштирокини таъминлаш кабиларни ташкил этади.

Жорий йилда пойтахтимизда хонадонбай ўрганиш натижасида уч ярим мингдан ортиқ низоли оилалар аниқланиб, улар хавфлилик даражасига кўра тоифаларга ажратилган.

Мазкур низоли оилаларнинг барчаси ички ишлар органларининг масъулларига бириктирилган. Президентимизнинг “Зўравонлик – бу жиноят, зўравонлик бизнинг маданиятимиз эмас!” деган сўзлари ҳам бу борада бизга дастуруламал бўлиб хизмат қилиши таъкидланди. Бириктирув тизимини мувофиқлаштирувчи пойтахт ва туманлар штаблари фаолияти йўлга қўйилди.

Низоли оилаларни ўрганиш, тизимли чора-тадбирлар амалга оширилиши жараёнида икки ярим мингдан ортиғида келишмовчиликлар бартараф этилиб, мингдан ортиқ оилалар яраштирилди.

Бироқ амалга оширилаётган ишларга қарамай, айрим оилаларда тазйиқ ва зўравонлик ҳолатлари, ҳуқуқбузарликлар ва жиноятлар содир этилмоқда. Тазйиқ ва зўравонлик ҳолатларнинг олдини олиш мақсадида хотин-қизларга ҳимоя ордери расмийлаштириш учун махсус “E-himoya”, “SOS”, “E-order” каби электрон тизимлар жорий этилди. Ҳимоя ордери расмийлаштирилган хонадонларга “Ташвиш” тугмалари ўрнатилди.

Жойларда хотин-қизлар масалалари бўйича инспекторлар томонидан маҳаллалар, идора ва ташкилотлар, ўқув даргоҳларида олиб борилган маънавий-маърифий тадбирлар, ҳуқуқий саводхонлигини ошириш бўйича тарғибот, суҳбат ва профилактик учрашувлар ўтказилди.

Шу билан бирга, намунали оилалар, хотин-қизлар рағбатлантирилиб борилмоқда. Давлатимиз томонидан аёлларнинг таълим олиши, ишлаши, жамият бошқарувидаги фаолиятини кучайтириш бўйича яратилаётган шарт-шароитлар ҳақида сўзга чиққанлар томонидан батафсил маълумот берилди.

Тадбирда сўз олган пробация ҳисобида турувчи Ш.Нодира ўз ҳаёт йўлини изга солишда, ҳалол меҳнат билан оиласини тебратишда катта ёрдам берган ички ишлар органлари ходимларига ўз миннатдорлигини билдирди.

Шунингдек, туман масъуллари томонидан тазйиқ ва зўравонликка учраган хотин-қизлар билан амалга оширилган ишлар, “Биз зўравонликка қаршимиз!” шиори остида ноябрь ойи давомида ташкиллаштирилган маърифий-маданий тадбирларни юқори даражада ўтказиб, катта натижаларга эришган бир гуруҳ хотин-қизлар масалалари бўйича инспекторлар ва маҳалла хотин-қизлар фаоллари, туман жамоалари етакчиларини тақдирлаш маросими ўтказилди.

Тадбир якунида ҳокимлик, маҳалла масъуллари, туманлар ИИО ФМБ раҳбарларига хотин-қизлар, низоли оилалар билан якка тартибда суҳбат ва профилактик тадбирлар ўтказиш, жиноят қурбонига айланиши мумкин бўлган аёллар билан “виктимологик” профилактик ишларни, “хонадонбай” ишлаш тизимини такомиллаштириш, аёллар ўртасида жиноятчилик, ахлоқ-одоб доирасидаги ҳуқуқбузарликларнинг олдини олиш бўйича аниқ ва манзилли чора-тадбирларни белгилаш, ёшларнинг турли оммавий ахборот воситалари, диний экстремистик оқимлар ва террорчи ташкилотлар таъсиридан ҳимоялаш бўйича чора-тадбирлар амалга ошириш бўйича қатор вазифалар белгиланди.

Тадбирнинг расмий қисмидан сўнг бадиий қисми “Паризода” рақс ансамбли, таниқли хонанда-созандалар ҳамда Ўзбекистон Давлат санъат ва маданият институти, республика эстрада ва цирк коллежи талабалари томонидан тайёрланган мусиқий чиқишлар, саҳна кўринишлари билан давом эттирилди.

Тошкент шаҳар ИИББ Ахборот хизмати