Ўзбекистон Республикаси Ички ишлар вазирлиги

Шу доирада Уйчи туманида ўтказилган навбатдаги ўрганиш жараёнларида дастлаб «Жийдакапа» маҳалласида жойлашган электрон кузатув маскани фаолияти ўрганилди. Мазкур маскан орқали маҳалла ҳудудида жамоат хавфсизлигини таъминлашга хизмат қилаётган кузатув тизимларининг иш ҳолати кўздан кечирилди.

Шунингдек, Наманган шаҳрининг катта қисмини, шунингдек Уйчи ва Наманган туманлари ҳудудларини ичимлик суви билан таъминлаётган «Жийдакапа» сув иншоотининг хавфсизлик чоралари ўрганилиб, объектнинг муҳофаза даражаси ва кечаю кундуз навбатчилик тартиби билан танишилди.

Ўрганиш давомида Андижон ва Наманган вилоятларини боғловчи йўлдаги ЙПХ маскани фаолияти ҳам кўздан кечирилиб, йўл патруль хизмати ва Карантин тадбирларини таъминлаш гуруҳи ходимларига йўлларда ҳаракат хавфсизлигини таъминлаш, вилоят ҳудудига кириб келаётган юк ва йўловчи транспортларини қонунчилик талабларига мувофиқ назорат қилиш бўйича зарур кўрсатмалар берилди.

Бундан ташқари, «Қумтепа» маҳалласи профилактика инспекторларининг фаолияти ўрганилди. Уларга ПҚ-1 ва ПҚ-253-сон қарорлар ижросини таъминлаш, манзилли профилактика тадбирларини ташкил этиш, фуқароларнинг мурожаатлари билан ишлаш ва уларни ўз вақтида ижобий ҳал этиш бўйича аниқ вазифалар юклатилди.

Шу билан бирга, туман бўйлаб хизмат олиб бораётган тунги нарядларга йўриқнома ўтказилиб, ходимларга хизмат интизоми, белгиланган вазифаларига қатъий амал қилиш, жамоат хавфсизлигини таъминлаш ва жиноятчиликнинг олдини олиш бўйича қўшимча топшириқлар берилди.

Мазкур йўналишдаги ўрганишлар вилоятнинг бошқа ҳудудларида ҳам изчил давом эттирилмоқда.

Наманган вилояти ИИБ Ахборот хизмати