Бухоро вилояти ИИБ раҳбарияти томонидан Шофирконда ижтимоий соҳа объектлари ва ички ишлар органлари фаолияти бўйича кенг қамровли ўрганиш ишлари ўтказилди
2025-11-21 14:35:00 / Янгиликлар
Бухоро вилояти ИИБ бошлиғи Шофиркон туманида тунги хавфсизликни таʼминлаш ва аҳолининг осойишталигини мустаҳкамлаш мақсадида жойлардаги хизмат ҳолатини ўрганди. Ўрганиш давомида бир қатор ижтимоий соҳа объектлари, туман ички ишлар бўлими ҳамда профилактика инспекторининг фаолияти кўздан кечирилиб, мавжуд камчиликлар юзасидан аниқ топшириқлар берилди.
Дастлаб, “Шофирконтумангаз” газ таʼминоти бўлимига ташриф буюрилиб, қишнинг совуқ кунларида аҳолига узлуксиз ва сифатли газ етказиб бериш жараёнлари ўрганилди. Масʼуллар билан суҳбат чоғида газ тақсимотини тўғри йўлга қўйиш, маҳсулот талон-тарож қилинишининг олдини олиш ва аҳолининг эҳтиёжидан келиб чиқиб, газ босимини меʼёрида ушлаб туриш бўйича тегишли топшириқлар белгиланди.
Шунингдек, “Ҳудудий электр тармоқлари” АЖ Шофиркон филиали тунги хизмат фаолияти кўздан кечирилди. Куз–қиш мавсумига тайёргарлик, фуқаролардан тушаётган мурожаатлар, электр таʼминотида содир бўлаётган узилишларга нисбатан ўз вақтида нарядлар юборилиши тартиби бўйича масʼулларга кўрсатмалар берилиб, масʼул ходимлар бириктирилди.
Навбатдаги манзилда, Шофиркон тумани тиббиёт бирлашмасида беморлар учун яратилган шароитлар, муассасанинг қўриқлаш тизими, тунги навбатчилик тартиби ҳамда мавсумий тайёргарлик даражаси ўрганилди. Мазкур йўналишлар бўйича зарур тавсиялар берилди.
Шундан сўнг, Шофиркон тумани ИИБнинг тунги хизмат фаолияти ўрганилди. Навбатчилик қисмининг хизматни ташкил этиш тартиби, чақирувларга жавоб бериш тезлиги, фуқароларнинг мурожаат ва аризаларини қабул қилиш тартиби, тезкор ахборот алмашинуви тизими бўйича шароитлар ўрганилди. Шунингдек, туман ИИБ бошлиғи томонидан жорий йилнинг ўтган ойида содир этилган жиноятлар таҳлили тақдим этилиб, раҳбарият томонидан жиноятчиликни олдини олиш бўйича зарур тавсиялар берилди.
“Қалмақон” маҳалласида олиб борилган ўрганишларда, профилактика инспекторининг тунги хизмат фаолияти, унинг ҳудудий инспектор-психолог ва қўриқлаш бўлими ходимлари билан ҳамкорлиги, “Маҳалла еттилиги“ ҳамда жамоатчилик билан олиб борилаётган профилактик чора-тадбирлар ўрганилди. Аҳолининг муаммоларини манзилли ҳал этиш, хавф гуруҳидаги шахсларни назорат қилиш бўйича бажарилаётган ишлар таҳлил қилинди.
Мазкур маҳаллада хизмат олиб бораётган қўриқлаш хизмати тунги фаолияти, чақирувлар бўйича куч ва воситаларнинг белгиланган вақтда етиб келиш ҳолати ҳам ўрганилиб, қўшимча объект ва хонадонларни қўриқловга олиш бўйича масʼулларга топшириқлар берилди.