Ўзбекистон Республикаси Криминология тадқиқот институти ҳамда Қатар Давлати ИИВ Полиция Академияси ҳузуридаги Хавфсизлик илмий-тадқиқотлар маркази ўртасида манфаатли музокаралар ўтказилди
2025-11-20 10:00:00 / Янгиликлар
Учрашувда делегация вакиллари сифатида – Қатар ИИВ Полиция Академияси ҳузуридаги Хавфсизлик илмий-тадқиқотлар маркази раҳбари Жассим Муҳаммад Ал-Обаидли, Қатар ИИВ Иқтисодий ва электрон жиноятлар департаменти директорининг ўринбосари Муҳаммад Ал Тани, Қатар ИИВ Халқаро ҳамкорлик департаменти вакили Муҳаммад Ал-Наама, Қатар ИИВ Жиноят-қидирув департаменти вакили Муҳаммад Ал-Маннаи ҳамда Қатар давлатининг Ўзбекистондаги элчиси Ҳасан Ҳамза Ҳошим иштирок этдилар.
Учрашув аввалида делегация вакиллари томонидан жорий йил 17-18 ноябрь кунлари Самарқанд шаҳрида муваффақиятли ташкил этилган “Жаҳон криминологиясининг илғор тажрибалари” номли иккинчи халқаро форум натижалари юксак баҳоланиб, тадбирга Қатар делегацияси вакиллари таклиф этилганлиги учун миннатдорлик билдирилди.
Музокаралар давомида Қатар ва Ўзбекистоннинг жиноятчиликка қарши курашиш ва уни олдини олиш борасидаги илмий ва амалий тажрибаларни ўзаро алмашиш, Жиноятчиликни чуқур тадқиқ этишга қаратилган қўшма илмий амалий тадқиқот лойиҳаларни амалга ошириш, Криминология тадқиқот институти ходимларини Қатар ИИВ ҳузуридаги илмий-тадқиқот муассасаларида илмий стажировка ўташларини йўлга қўйиш, Криминология, жиноятчиликни олдини олиш соҳасидаги илмий мақола ва тезисларни ҳамкор мамлакатларнинг илмий нашрларида чоп эттириш каби муҳим йўналишдаги масалалар муҳокама қилинди.
Шунингдек Ўзбекистонда Қатар давлатининг жиноятчиликни барвақт олдини олиш ҳамда криминологик фаолиятни ривожлантириш борасидаги тажрибасини мунтазам ўрганиш ва илғор тажрибаларни жорий этишга қаратилган “Қатар криминологиясини тадқиқ қилиш офиси”ни ташкил этиш масаласи хам кўриб чиқилди.
Қолаверса, томонлар икки томонлама меморандум имзолаш масаласини кун тартибига киритиш, ушбу меморандум лойиҳасини ишлаб чиқиб юбориш ҳамда унга ҳамкорликнинг устувор йўналишларига доир муҳим масалаларни киритиш бўйича хам келишиб олдилар.
Учрашув якунида томонлар келгусида яқин ҳамкорликни янада ривожлантириш, тажриба алмашиш ва қўшма ташаббусларни қўллаб-қувватлашга тайёр эканликларини билдирдилар.