Бухоро вилояти ИИБ раҳбарияти томонидан Қоракўл туманида тунги вақтда жамоат тартибини таъминлаш ҳолати ўрганиб чиқилди
2025-11-16 00:15:00 / Янгиликлар
Бухоро вилояти ИИБ бошлиғи Қоракўл туманида аҳоли осойишталигини таъминлаш бўйича олиб борилаётган чора-тадбирларни ўрганди. Тунги назорат ишлари доирасида туманнинг бир қатор муҳим ижтимоий объектлари, маҳалла ва таълим муассасаларидаги ҳолат ҳар томонлама кўздан кечирилди.
Бошқарма бошлиғи, аввало, криминоген ҳолати мураккаб ҳисобланган «Дўстлик» маҳалласида бўлиб, профилактика инспекторининг хизмат хонасига ташриф буюрди. Мазкур маҳалладаги кўча, хонадон, оилалар, ҳудуддаги умумтаълим мактаби, мактабгача таълим муассасаси, шунингдек, турли хизмат кўрсатувчи масканлар фаолияти бўйича маълумотлар тингланди.
Маҳаллада жамоат тартибини сақлаш, камералаштириш ишлари ва тунги хизмат фаолияти таҳлил қилиниб, профилактика инспектори ҳамда маҳалла раисининг ҳудудда жиноятчилик ва ҳуқуқбузарликларни олдини олиш бўйича фикрлари тингланди.
Кейинги манзилда, Қоракўл туман тиббиёт бирлашмасига ташриф амалга оширилиб, биноларининг ёритилиши, қоровул хизмати, пульт орқали қўриқловга уланганлиги, шу билан бирга, аҳоли билан ишлаш, ҳудудда турли тартибсизликларнинг олдини олиш бўйича қўшимча вазифалар белгилаб берилди.
Ўрганиш давомида, Қоракўл ихтисослаштирилган мактаб-интернатидаги тунги хавфсизлик тизими, қоровул хизмати ва куз-қиш мавсумига тайёргарлик жараёнлари кўздан кечирилди.
Мазкур таълим муассасаси ўғил ва қиз болалар таҳсил оладиган йирик интернат мактаб бўлиб, биноларнинг ёритилиши, қўриқлов пульти билан боғлаш, ўқувчилар ўртасида ҳуқуқбузарликларни барвақт олдини олиш бўйича масъулларга кўрсатмалар берилди.
Қоракўл тумани ИИБ фаолиятини ўрганиш жараёнида эса, туманда жамоат хавфсизлигини таъминлаш, келиб тушаётган мурожаатларга тезкор муносабат билдириш, тезкор-тергов гуруҳларнинг воқеа жойига ўз вақтида етиб бориши масалалари муҳокама қилинди. Тунги хизматни кучайтириш мақсадида бир қатор қўриқлаш гуруҳлари фаолияти ўрганилиб, уларга қўшимча куч ва воситалар бириктириш бўйича кўрсатмалар берилди.
Ўрганиш якунида бошқарма бошлиғи томонидан, таълим муассасалари қоровулларини бир хил турдаги ёритгичли нимча, зарур хизмат анжомлари билан таъминлаш, ҳар бир ижтимоий объект қоровулига профилактика инспекторининг шахсий алоқа рақамлари кўрсатилган махсус карточка тақдим этиш ва ўзаро ҳамкорликни кучайтириш, савдо ва хизмат кўрсатиш масканларини техник қўриқловга улашни жадаллаштириш, аҳоли кўп тўпланадиган жойларга қўшимча куч-воситалар бириктириш, кўп қаватли уйлар олдида қуёш панелли ёритгич ва видеокамералар билан жиҳозланган намунавий велотураргоҳлар ташкил этиш бўйича устувор вазифалар белгиланди.
Бухоро вилояти ИИБ Ахборот хизмати