Қашқадарё вилояти ИИБ раҳбарияти томонидан Қарши туманида профилактика ва хавфсизлик масалалари ўрганилди
2025-11-15 19:55:00 / Янгиликлар
Дастлаб, Қашқадарё вилояти ИИБ бошлиғи полковник Абдувохид Исмоилов Қарши тумани Боғобод МФЙ ҳудудида тунги хизматга жалб қилинган ходимлар билан учрашди.
Учрашувда профилактика инспекторлари, қўриқлаш бўлимлари ходимлари ҳамда маҳалла фаоллари иштирок этиб, жамоат тартибини сақлаш, фуқаролар осойишталигини таъминлаш, хизмат интизомига қатъий амал қилиш, тунги навбатчиликда ҳушёрликни ошириш масалалари муҳокама қилинди.
Кейинчалик ўрганишлар давом эттирилиб, бошқарма бошлиғи Ахборот технологиялари ва менежмент университетида бўлди. У ерда яратилган шароитлар, кузатув камераларининг ўрнатилганлиги, ҳудуднинг қўриқлов тизими ҳамда куз–қиш мавсумига тайёргарлик жараёнлари кўздан кечирилди. Аниқланган жиҳатлар бўйича масъулларга тегишли топшириқлар берилди.
Шундан сўнг, вилояти ИИБ бошлиғи туман ҳудудидаги автошоҳбекат фаолияти билан танишди. Бу ерда аҳолининг келиб-кетиши учун яратилган қулайликлар, объектнинг кузатув камералар билан тўлиқ жиҳозланганлиги, қўриқлов тизими ишлаши кўриб чиқилди ва ушбу йўналишдаги ишларни янада такомиллаштириш юзасидан мутасаддиларга топшириқлар берилди.
Вилоят ИИБ бошлиғи Боғобод МФЙ биносини ҳам кўздан кечириб, маҳалла фуқароларига хизмат кўрсатиш шароитлари, мавсумий тайёргарлик, маҳаллага кириб-чиқадиган объектларнинг кузатувга олиниши билан танишди. Маҳалла даражасидаги хавфсизликни таъминлаш, жиноятчилик ва ҳуқуқбузарликларнинг олдини олиш, профилактик ишларни янада кучайтириш бўйича керакли кўрсатмалар берди.
Қашқадарё вилояти ИИБ Ахборот хизмати