Бухоро вилояти ИИБ раҳбарияти томонидан Когон тумани ички ишлар бўлинмаларида олиб борилаётган қурилиш ва реконструкция ишлари ўрганилди
2025-11-12 11:10:00 / Янгиликлар
Бухоро вилояти Ички ишлар бошқармаси бошлиғи томонидан Когон тумани ички ишлар бўлимига ташриф амалга оширилиб, бу ерда амалга оширилаётган қурилиш ва таъмирлаш ишлари жараёни ўрганилди.
Ташриф давомида бошқарма раҳбари томонидан туман Йўл ҳаракати хавфсизлиги ҳамда миграция ва фуқароликни расмийлаштириш бўлинмаси учун мўлжалланган янги биноларда бажарилаётган ишлар сифати, лойиҳа талабларига мувофиқлиги ҳамда ишларни белгиланган муддатларда якунлаш ҳолати кўздан кечирилди.
Масъулларга қурилиш ишларини янада жадаллаштириш, хавфсизлик меъёрларига қатъий риоя этиш, замонавий меҳнат шароитларини яратиш бўйича тегишли кўрсатма ва тавсиялар берилди.
Ўрганиш жараёнларининг иккинчи қисмида, вилоят ИИБ бошлиғи «Махсус қабулхона»да олиб борилаётган қурилиш ва реконструкция ишлари ҳолатини ҳам ўрганди. Объектни тўлиқ кўздан кечириш давомида бажарилаётган ишларнинг сифати, муддатларга риоя этилиши ҳамда лойиҳа бўйича режалаштирилган чора-тадбирларнинг ижроси батафсил таҳлил қилинди.
Маълумот учун, «Махсус қабулхона» 2020 йил 11 март куни ташкил этилган бўлиб, 1,5 гектар майдонда жойлашган ва 75 ўринга мўлжалланган. Сўнгги йилларда бу ерда сақланаётган шахслар сонининг ортиб бораётгани сабабли бинони кенгайтириш зарурати юзага келган.
Бошқарма бошлиғи мавжуд камчиликларга эътибор қаратиб, уларни бартараф этиш, иш сифатини ошириш ҳамда лойиҳани замонавий инфратузилма талаблари асосида якунлаш зарурлигини таъкидлади.
Шунингдек, у амалга оширилаётган реконструкция ишлари ички ишлар органлари тизимидаги ислоҳотларнинг узвий қисми эканини қайд этиб, лойиҳа якунида ходимлар учун қулай хизмат шароитлари яратилиши, фуқароларга кўрсатилаётган хизматлар сифати эса янада ошишини алоҳида таъкидлади.
Бухоро вилояти ИИБ Ахборот хизмати