Ички ишлар вазирлигида Тиббиёт ходимлари кунига бағишланган тантанали тадбир бўлиб ўтди: фидойи шифокор ва ҳамширалар хизматлари юксак баҳоланди
2025-11-08 19:00:00 / Янгиликлар
Ҳар йили юртимизда ноябр ойининг иккинчи якшанбаси тиббиёт ходимлари куни сифатида кенг нишонланади.
Ички ишлар вазирлиги тиббиёт бўлинмаларида ҳам ходимларнинг жисмоний ва руҳий тетиклик билан хизмат ўташлари учун, уларнинг саломатликларини назорат қилувчи, даволовчи, ҳар томонлама кўмак берувчи шифокор ва ҳамширалар фаолият олиб боришади.
Вазирлик маданият саройида ташкил этилган байрам тадбирида уларнинг бир гуруҳи тантанали тарзда тақдирланди.
Дастлаб байрам муносабати Ички ишлар вазирининг тиббиёт ходимларига йўллаган табриги ўқиб эшиттирилди.
Тизимда тиббий профилактика ишлари жадал олиб борилаётганлиги натижасида ходимларнинг турли касалликларга чалиниши кескин камайганлиги эътироф этилди.
Бу албатта оқ либосли саломатлик посбонларининг, шифокор ва ҳамшираларнинг фидокорона меҳнатлари самараси эканлиги таъкидланди.
Ҳозирда вазирликнинг барча ҳудудий бўлинмаларида даволаш профилактика муассасалари фаолият олиб бормоқда. Жорий йилда Бухоро вилояти ва Тошкент шаҳридаги Тиббиёт бўлимлари учун бинолар қурилиб, фойдаланишга топширилган бўлса Жиззах вилоятида янги лойиҳалар устида иш олиб борилмоқда.
Байрам муносабати билан Ички ишлар вазирининг тегишли буйруғига кўра кўплаб ходимлар мукофотланди. Тадбир давомида шунингдек ҳамкор ташкилотлар масъуллари томонидан юздан ортиқ тиббиёт ходимларига мукофотлар топширилди.
Тақдирлаш маросимидан сўнг байрам дастури Ички ишлар вазирлиги маданият саройи санъаткорлари ижросидаги тароналар билан давом этди. Куй-қўшиқларда тиббиёт ходимларининг фидокорона хизматлари, уларнинг шарафли фаолияти мадҳ этилди.
Бу каби тадбирлар ҳудудий ички ишлар органларида ҳам давом этмоқда.