Бухоро вилояти Ғиждувон туманида аҳоли мурожаатларини ҳал этиш бўйича сайёр қабул ўтказилди
2025-11-07 12:00:00 / Янгиликлар
Қабулда Ғиждувон тумани аҳолиси, шунингдек, вилоятнинг бошқа ҳудудларидан келган 50 нафарга яқин фуқаро иштирок этди. Фуқаролар ўз мурожаатлари орқали вилоят раҳбарига турли соҳалардаги муаммоларини етказишди.
Тадбирда вилоят ҳокимининг ўринбосарлари, тегишли соҳа ва ташкилот раҳбарлари, шунингдек, ҳуқуқни муҳофаза қилувчи идоралар, жумладан, Бухоро вилояти Ички ишлар бошқармаси бошлиғи ҳам иштирок этди.
Сайёр қабул давомида, Ички ишлар бошқармаси бошлиғи томонидан 10 га яқин мурожаат ўрганилди. Мурожаатлар асосан терговга қадар текширув, дастлабки тергов ва суриштирув жараёнлари, иш ҳақи ундирилиши, шунингдек, транспорт воситаларидан тақиқни ечиш масалаларига оид бўлди.
Ҳар бир мурожаат бўйича фуқароларга қонунчилик талаблари асосида тушунтиришлар берилди, айрим масалалар жойида ҳал этилди, қўшимча ўрганиш талаб этиладиганлари бўйича эса мутасаддиларга тегишли топшириқлар берилди.
Ҳал этилиши учун маълум муддат талаб этиладиган мурожаатлар ижроси юзасидан масъул ташкилот раҳбарларига аниқ вазифалар юклатилиб, уларнинг бажарилиши қатъий назоратга олинди.
Бухоро вилояти ИИБ Ахборот хизмати