Ўзбекистон Республикаси Давлат активларини бошқариш агентлиги

Аввал хабар берилганидек, тегишли хусусийлаштириш дастурларига мувофиқ, “Tashkent New Palace” МЧЖ (кейинги ўринларда - "Lotte City Hotel Tashkent Palace" ёки "Lotte" меҳмонхонаси) ва “InterHotel” МЧЖ (кейинги ўринларда - “International” меҳмонхонаси)лар устав капиталларидаги 100% давлат улушини очиқ савдо жараёнлари бошланган.

I. “Lotte City Hotel Tashkent Palace” меҳмонхонаси бўйича:

Давактив агентлиги томонидан "KPMG" халқаро консалтинг компаниясини хусусийлаштириш бўйича консультант сифатида ва "Deloitte" халқаро консалтинг компаниясини мустақил баҳолаш ишларини амалга оширишга жалб қилган ҳолда “Lotte City Hotel Tashkent Palace” меҳмонхонасини очиқ савдо жараёнлари бошланган.

Мазкур меҳмонхонани бошқариш “Hotel Lotte CO., Ltd” компанияси (Корея Республикаси) томонидан, у билан 2013 йилда меҳмонхонани бошқариш тўғрисида тузилган келишувга асосан амалга оширилиб келинмоқда.

Халқаро консультант ва Давактив агентлиги томонидан хусусийлаштириш жараёни доирасида ҳам маҳаллий, ҳам халқаро даражада кенг кўламли маркетинг ишлари амалга оширилди, жумладан, инвестиция тизерлари "KPMG" халқаро консалтинг компаниясини дунёдаги минтақавий офислар тармоғи орқали турли хорижий инвесторларга (investor sounding) юборилди.

Натижада МДҲ, Жанубий Осиё ва Европа давлатларидаги 15 нафар халқаро ҳамда маҳаллий инвесторлар томонидан сотиб олиш бўйича қизиқиш тўғрисидаги аризалар (Expression of Interest) Консультантга келиб тушди.

Шу ўринда, Консультант томонидан хусусийлаштириш жараёнининг кейинги – Мажбуриятга эга бўлмаган таклифлар (NBO)ни тақдим этиш босқичига белгиланган мезонларга мувофиқ бўлган 13 нафар талабгор иштирок этиш учун таклиф қилинган. Мазкур босқичда, Ахборотни ошкор этмаслик (NDA) тўғрисидаги битим имзоланиб, Мажбуриятга эга бўлмаган таклифлар (NBO)ни тайёрлаш учун Консультант томонидан тайёрланган таҳлилий ахборотларни ўз ичига олган виртуал маълумотлар хонаси (VDR)га кириш имконияти яратилган.

Белгиланган муддатларда Мажбуриятга эга бўлмаган таклифлар (NBO) тақдим қилган  9 нафар талабгор хусусийлаштириш жараёнининг якуний Мажбуриятга эга бўлган таклифлар (BO)ни қабул қилиш босқичида иштирок этиш учун таклиф этилди ҳамда уларга халқаро консультант томонидан тайёрланган “Lotte” меҳмонхонасининг молиявий, солиқ, ҳуқуқий ва экологик фаолияти юзасидан комплекс таҳлил (due diligence) ҳисоботлари жойланган виртуал маълумотлар хонаси (VDR)га кириш имконияти яратилди. Шу билан бирга, барча талабгорларга “Lotte” меҳмонхонасининг бошқарув органи билан учрашувлар ташкил этилди ҳамда Меҳмонхона билан танишиш имконияти яратилди.

Белгиланган муддатларда 3 нафар талабгор томонидан Мажбуриятга эга бўлган таклифлар (BO) тақдим қилинган.

“Lotte” меҳмонхонасини сотиб олиш учун қўйилган талабларига қатъий риоя этган ҳолда бошқа талабгорларнинг тижорат таклифидан юқори нарх таклифини билдирган “ALFA INVEST Суғурта Компанияси” АЖ 20 млн.АҚШ доллари миқдорида сотиб олиш тўловини тўлаш шарти билан савдо ғолиби деб топилди.

Қайд этиш жоизки, “Lotte” меҳмонхонаси ташқи кўринишининг архитектура қиёфасини инобатга олган ҳолда келгусида ҳар қандай қурилиш-таъмирлаш ва реконструкция ишларини Ўзбекистон Республикаси Қурилиш ва уй-жой коммунал хўжалиги вазирлиги ҳамда Маданий мерос агентлиги билан келишилган ҳолда амалга ошириш бўйича қатъий талаб Инвестор томонидан қабул қилинган.

Таъкидлаш жоизки, мазкур қатъий нарх таклифи халқаро мустақил баҳоловчи "Deloitte" компанияси томонидан баҳоланган қийматдан юқори ва "KPMG" халқаро консалтинг компанияси томонидан “Lotte” меҳмонхонасини сотилиши мумкин бўлган қийматлар диапазонининг юқори қисмида жойлашган.

“Lotte” меҳмонхонасининг хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.

Маълумот учун: “ALFA INVEST Суғурта Компанияси” АЖ – Ўзбекистондаги йирик суғурта компанияларидан бири ҳисобланади. Ушбу компания барча турдаги ихтиёрий ҳамда мажбурий суғурта хизматларини тақдим этиб келмоқда. "ALFA INVEST Суғурта Компанияси" АЖга "Moody's Investors Service" (АҚШ) халқаро рейтинг агентлиги томонидан "барқарор" прогноз билан "B2" даражасидаги рейтинг берилган. 

II.  “International” меҳмонхонаси бўйича:

Давактив агентлиги томонидан "Deloitte" халқаро консалтинг компаниясини хусусийлаштириш бўйича консультант сифатида ва "Ernst & Young" халқаро консалтинг компаниясини мустақил баҳолаш ишларини амалга оширишга жалб қилган ҳолда “International” меҳмонхонасини очиқ савдо жараёнлари бошланган.

Халқаро консультант ва Давактив агентлиги томонидан хусусийлаштириш жараёни доирасида ҳам маҳаллий, ҳам халқаро даражада кенг кўламли маркетинг ишлари амалга оширилди, жумладан, инвестиция тизерлари "Deloitte" халқаро консалтинг компаниясини дунёдаги минтақавий офислар тармоғи орқали турли хорижий инвесторларга (investor sounding) юборилди.

Натижада Араб, Шарқий Осиё ва Европа давлатларидаги 6 нафар халқаро ҳамда маҳаллий инвесторлар томонидан сотиб олиш бўйича қизиқиш тўғрисидаги аризалар (Expression of Interest) Консультантга келиб тушди.

Шу ўринда, Консультант томонидан хусусийлаштириш жараёнининг кейинги – Мажбуриятга эга бўлмаган таклифлар (NBO)ни тақдим этиш босқичига белгиланган мезонларга мувофиқ бўлган барча талабгорлар иштирок этиш учун таклиф қилинган. Мазкур босқичда, Ахборотни ошкор этмаслик (NDA) тўғрисидаги битим имзоланиб, Мажбуриятга эга бўлмаган таклифлар (NBO)ни тайёрлаш учун Консультант томонидан тайёрланган таҳлилий ахборотларни ўз ичига олган виртуал маълумотлар хонаси (VDR)га кириш имконияти яратилган.

Белгиланган муддатларда Мажбуриятга эга бўлмаган таклифлар (NBO) тақдим қилган 4 нафар талабгор хусусийлаштириш жараёнининг якуний Мажбуриятга эга бўлган таклифлар (BO)ни қабул қилиш босқичида иштирок этиш учун таклиф этилди ҳамда уларга халқаро консультант томонидан тайёрланган “International” меҳмонхонасининг молиявий, солиқ, ҳуқуқий ва экологик фаолияти юзасидан комплекс таҳлил (due diligence) ҳисоботлари жойланган виртуал маълумотлар хонаси (VDR)га кириш имконияти яратилди. Шу билан бирга, барча талабгорларга “International” меҳмонхонасининг бошқарув органи билан учрашувлар ташкил этилди ҳамда “International” меҳмонхонаси билан танишиш имконияти яратилди.

Белгиланган муддатларда 3 нафар талабгор томонидан Мажбуриятга эга бўлган таклифлар (BO) тақдим қилинган.

Натижада, “International” меҳмонхонасини сотиб олиш учун энг юқори нарх таклифини билдирган “Smart Fast Stroy” МЧЖ 26 млн.АҚШ доллари миқдорида сотиб олиш тўловини тўлаш шарти билан савдо ғолиби деб топилди.

Шу билан бирга, Инвестор “InterHotel” МЧЖдаги 100 фоиз давлат улушини 26 млн.АҚШ долларига сотиб олиш билан бирга Жамиятнинг тегишли банк олдидаги 14,7 млн. Евро миқдоридаги кредит қарздорлигини ҳам қабул қилаётганлиги Инвестор томонидан Битим доирасида 41 млн. АҚШ долларидан кўп маблағ йўналтирилишини таъкидлаш лозим. 

Айтиш жоизки, мазкур қатъий нарх таклифи халқаро мустақил баҳоловчи "Ernst & Young" компанияси томонидан баҳоланган қийматдан сезиларли юқори ва "Deloitte" халқаро консалтинг компанияси томонидан “International” меҳмонхонасини сотилиши мумкин бўлган қийматлар диапазонининг юқори қисмида жойлашган.

“International” меҳмонхонасининг хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.