Ўзбекистон Республикаси Давлат активларини бошқариш агентлиги

V Тошкент халқаро инвестиция форуми доирасида Ўзбекистон Республикаси Давлат активларини бошқариш агентлиги томонидан давлат активларини хусусийлаштириш жараёнларини жадаллаштириш, халқаро стратегик инвесторларни жалб қилиш ҳамда хусусий сектор иштирокини кенгайтиришга қаратилган муҳим келишувларга эришилди.

 

Форум якунлари бўйича давлат активларини хусусийлаштириш соҳасида инвестициявий ва амалий аҳамиятга эга бўлган иккита ҳамкорлик ҳужжати имзоланди.

 

MobiUz бўйича АҚШнинг “McKim and Company” компанияси бошчилигидаги молиявий инвесторлар ва соҳавий технологик ҳамкор “JVR Enterprises LLC” (DBA – “JVR Capital Group”) иштирокидаги консорциум​ билан ҳамкорлик меморандуми имзоланди

 

Хусусан, Давлат активларини бошқариш агентлиги ҳамда АҚШнинг “McKim and Company” компанияси бошчилигидаги молиявий инвесторлар ва соҳавий технологик ҳамкор “JVR Enterprises LLC” (DBA – “JVR Capital Group”) иштирокидаги консорциуми ўртасида “Universal Mobile Systems” МЧЖ (MobiUz) устав капиталидаги давлат улушини хусусийлаштириш жараёнини муваффақиятли амалга ошириш бўйича ҳамкорлик меморандуми имзоланди.

 

 

Мазкур ҳамкорлик доирасида MobiUz компаниясини хорижий инвесторга 351 млн АҚШ доллари миқдорида сотиш, шунингдек, телекоммуникация инфратузилмасини модернизация қилиш ва тармоқни янада ривожлантириш мақсадида қўшимча 500 млн АҚШ доллари инвестицияларни жалб этиш бўйича ҳамкорлик қилиш назарда тутилган. Лойиҳанинг умумий қиймати 851 млн АҚШ долларини ташкил этади.

 

 

Ушбу келишув рақамли инфратузилмани модернизация қилиш, соҳада рақобат муҳитини кучайтириш ва мамлакат телекоммуникация тармоғини янада ривожлантиришга хизмат қилади.

 

“UzXCMG” қўшма корхонасидаги давлат улушини хусусийлаштириш бўйича XCMG билан ҳамкорлик йўлга қўйилмоқда

 

Шунингдек, V Тошкент халқаро инвестиция форуми доирасида Давлат активларини бошқариш агентлиги ҳамда Хитойнинг “XCMG Construction Machinery Co., Ltd” компанияси ўртасида “UzXCMG” МЧЖ қўшма корхонаси устав капиталидаги давлат улушини хусусийлаштириш жараёнини самарали амалга ошириш бўйича ҳамкорлик меморандуми имзоланди.

 

 

Меморандум доирасида давлат улушини хусусийлаштириш бўйича жараёнда томонлар ўртасида ўзаро ҳамкорликни йўлга қўйиш, тажриба алмашиш ҳамда саъй-ҳаракатларни мувофиқлаштириш орқали жараённинг самарадорлиги ва шаффофлигини таъминлаш назарда тутилган.

 

Мазкур келишув “UzXCMG” қўшма корхонасини хусусийлаштириш жараёнини халқаро стандартлар асосида ташкил этиш, стратегик инвесторлар билан ҳамкорликни мустаҳкамлаш ҳамда мамлакатда машинасозлик ва саноат кооперациясини янада ривожлантиришга хизмат қилади.

 

 

Имзоланган ҳужжатлар Ўзбекистонда давлат иштирокини иқтисодиётда қисқартириш, хусусий сектор ролини ошириш ва давлат активларини бозор тамойиллари асосида трансформация қилишга қаратилган ислоҳотларнинг изчил давом этаётганини намоён этмоқда.

 

Шунингдек, мазкур келишувлар халқаро стратегик инвесторларнинг Ўзбекистонда амалга оширилаётган кенг кўламли иқтисодий ислоҳотларга бўлган юқори ишончи ва қизиқиши тобора ортиб бораётганининг яна бир яққол тасдиғи ҳисобланади.