“MobiUz” халқаро хусусийлаштириш жараёнлари муваффақиятли якунланди
2026-06-04 09:00:00 / Янгиликлар
Аввал хабар қилинганидек, тегишли хусусийлаштириш дастурларига мувофиқ, “Universal Mobile Systems” МЧЖ (MobiUz) устав капиталидаги 100 фоиз давлат улушини сотиш бўйича халқаро очиқ савдо жараёнлари ўтказилди.
Мазкур жараён доирасида “Rothschild & Co” халқаро инвестиция банки стратегик консультант, “катта тўртлик” туркумига кирувчи “KPMG” молиявий консультант ҳамда “Deloitte” мустақил баҳоловчи сифатида жалб этилди.
Савдо жараёни халқаро бозорларда кенг тарғиб қилинди, жумладан консультантларнинг глобал офислари тармоқлари орқали 100 дан ортиқ стратегик ва молиявий инвесторлар билан индивидуал мулоқотлар ўтказилди. Шунингдек, битимга оид маълумотлар “Bloomberg” ва “Financial Times” каби етакчи халқаро оммавий ахборот воситалари орқали ёритилди ҳамда халқаро роуд-шоу (Road Show)лар доирасида инвесторларга тақдим қилинди.
Натижада, мазкур жараёнда АҚШ, Япония, Форс кўрфази мамлакатлари, Европа ҳамда Кавказорти минтақаларидан 15 дан зиёд (аксарияти хорижий) инвестор иштирок этди. Бунда, 10 нафар иштирокчи томонидан дастлабки нарх таклифлари тақдим этилди.
Талабгорларга консультантлар томонидан халқаро стандартлар асосида тайёрланган комплекс молиявий ва юридик таҳлилий маълумотлар (due diligence) тақдим этилди ҳамда 6 нафар иштирокчи томонидан “МobiUz”ни сотиб олиш бўйича мажбуриятга эга бўлган қатъий таклифлар (Binding Offer) қабул қилинди.
Давлат учун энг юқори иқтисодий самарадорликка эришиш мақсадида жараён инвесторларнинг кенг доирасидан энг рақобатбардош таклифларни жалб қилишга қаратилган тарзда ташкил этилди. Якуний босқичда иштирокчиларга қатъий нарх таклифларини янада яхшилаш имконияти тақдим этилди.
Хусусийлаштириш жараёни якуни бўйича Давлат активлари агентлиги томонидан АҚШнинг “McKim and Company” компанияси бошчилигидаги молиявий инвесторлар ва соҳавий технологик ҳамкор “JVR Enterprises LLC” (DBA – “JVR Capital Group”) иштирокидаги консорциум таклифи ғолиб деб топилди. Ушбу таклифга мувофиқ, MobiUz компаниясининг қиймати 351 млн АҚШ доллари даражасида баҳоланган бўлиб, шунингдек телекоммуникация инфратузилмасини ривожлантиришга 500 млн АҚШ долларигача инвестиция киритиш режалаштирилган.
Таъкидлаш жоизки, мазкур таклифнинг сотиш самарадорлигини кўрсатувчи EV/EBITDA мультипликатори 7,4х ни ташкил этиб, битимнинг юқори самарадорлигини акс эттиради. Мазкур кўрсаткич қиёсий битимлар билан солиштирганда бизнеснинг рақобатбардош баҳоланганини кўрсатади ҳамда мустақил баҳоловчи томонидан аниқланган қийматдан сезиларли даражада юқоридир.
Битимни якунлаш учун тегишли тартибга солувчи органларнинг зарур рухсатномаларини олиш, шунингдек белгиланган корпоратив ва ҳуқуқий тартиб-таомилларни бажариш талаб этилади.
Давлат активлари агентлиги мазкур жараёнда иштирок этган барча инвесторларга билдирган қизиқиши ва тақдим этган таклифлари учун миннатдорлик билдиради. Шунингдек, жараённинг юқори халқаро стандартлар асосида ташкил этилишига қўшган муносиб ҳиссаси учун консультантлар – “KPMG”, “Rothschild & Co” ва “Deloitte” жамоаларига алоҳида ташаккур изҳор этади.
Давлат активлари агентлиги келгусида ҳам халқаро инвесторлар ва консультантлар билан ўзаро манфаатли ҳамкорликни янада кенгайтиришга умид қилади.