Риэлторлик фаолиятининг ҳуқуқий асослари такомиллаштирилмоқда
2026-04-07 14:00:00 / Янгиликлар
Бугун Олий Мажлис Сенатининг 14 ялпи мажлисида “Риелторлик фаолияти тўғрисида”ги Қонун муҳокама қилиниб, натижаси бўйича маъқулланди.
Таъкидланганидек, сўнгги йилларда аҳоли сонининг ортиши ва урбанизация жараёнларининг жадаллашуви кўчмас мулк бозорининг ривожланишига олиб келмоқда. Шу билан бирга, риелторлик фаолиятини тартибга солишнинг амалдаги механизмларини такомиллаштириш зарурати юзага келмоқда.
Айни пайтда риелторлик фаолиятининг айрим ҳолларда норасмий тарзда амалга оширилаётгани бозорнинг очиқлиги ва шаффофлигига салбий таъсир кўрсатмоқда. Натижада “яширин иқтисодиёт”нинг сақланиб қолиши ҳамда айрим фуқаролар ҳуқуқларининг бузилиши каби ҳолатлар кузатилмоқда.
Мазкур Қонун билан:
- риелторлик фаолиятини амалга оширишнинг ҳуқуқий асосларини такомиллаштириш назарда тутилмоқда;
- риелторлик фаолиятини давлат томонидан тартибга солиш механизмлари аниқлаштирилади;
- кўчмас мулк бозорида иштирок этувчи шахсларнинг ҳуқуқ ва мажбуриятлари белгиланади;
- риелторлик хизматлари бозорида очиқлик ва шаффофликни таъминлашга қаратилган нормалар жорий этилади;
- фуқароларнинг мулк ҳуқуқларини ҳимоя қилиш кафолатлари кучайтирилади.
Қонуннинг қабул қилиниши риелторлик хизматлари бозорини тартибга солиш, соҳада қонунийликни мустаҳкамлаш ҳамда “яширин иқтисодиёт”ни қисқартиришга хизмат қилади.