Давлат активлари агентлиги ходимлари VIII Тошкент халқаро марафонида иштирок этди
2026-04-06 15:00:00 / Янгиликлар
Жорий йилнинг 5 апрель куни Давлат активларини бошқариш агентлиги тизими ходимлари Наврўз умумхалқ байрами муносабати билан анъанавий VIII Тошкент халқаро марафонида иштирок этди. Тадбир Ўзбекистон Республикаси Спорт вазирлиги, Ўзбекистон енгил атлетика федерацияси ҳамда ProRun компанияси томонидан ташкил этилди.
Мазкур спорт тадбири мамлакатимиздаги энг йирик оммавий югуриш мусобақаларидан бири бўлиб, ҳар йили турли давлатлардан минглаб иштирокчиларни бирлаштиради. Марафон доирасида турли масофалар, жумладан оммавий иштирокчилар учун мўлжалланган 5 километр масофа ҳам ташкил этилди.
Давлат активлари агентлиги вакиллари 5 километр масофани муваффақиятли босиб ўтиб, жамоавийлик, ҳамжиҳатлик ва соғлом турмуш тарзига содиқлигини намоён этди.
Бундай тадбирларда иштирок этиш ходимлар ўртасида корпоратив маданиятни мустаҳкамлаш, жисмоний фаолликни ошириш ҳамда оммавий спортни ривожлантиришга қаратилган ташаббусларни қўллаб-қувватлашга хизмат қилади.