Ўзбекистон Республикаси Давлат активларини бошқариш агентлиги

Аввал хабар қилинганидек, “Universal Mobile Systems” МЧЖ (MobiUz) устав капиталидаги 100 фоиз давлат улушини халқаро очиқ савдо жараёнларининг якуний босқичи давом этмоқда.

Савдо жараёнини шаффоф ва рақобат муҳитида ўтказиш мақсадида, қуйидаги халқаро консалтинг компаниялари жалб этилганлиги эслатиб ўтилади:

• стратегик ва молиявий консультант сифатида – “Rothschild & Co”;
• молиявий консультант сифатида, шунингдек молиявий, солиқ ва юридик экспертиза (vendor due diligence) учун – “KPMG”;
• мустақил баҳоловчи сифатида – “Deloitte”.

Савдо жараёнининг NBO (мажбуриятга эга бўлмаган таклифлар) босқичида 10 та хорижий инвестордан NBO таклифлари келиб тушган. Консультантлар тавсиясига асосан, 7 нафар талабгор якуний – BO (мажбуриятга эга бўлган қатъий нарх таклифлари) босқичига ўтказилган.

Якуний босқич доирасида талабгорларга Консультантлар томонидан тайёрланган Жамиятнинг молиявий, солиқ ва юридик фаолияти бўйича комплекс таҳлилий ҳисоботлари (vendor due diligence) жойлаштирилган виртуал маълумотлар хонаси (VDR)га кириш, шунингдек, Жамиятнинг операцион фаолияти билан батафсил танишиш ва раҳбарияти билан учрашув ўтказиш ҳамда қизиқтирган масалаларни муҳокама қилиш (Management Presentation) имконияти яратилди.

Шу билан бирга, иштирокчилар томонидан Жамиятни сотиб олиш ва унинг келгусидаги фаолияти бўйича асосий шартлар тўғрисидаги Битим (Term Sheet) имзоланди.

Белгиланган муддат – 2025 йил 19 декабрга қадар, 6 нафар талабгордан Жамиятни сотиб олиш бўйича мажбуриятга эга бўлган қатъий нарх таклифлари (BO) қабул қилинди.

Мазкур BO таклифлари таҳлили асосида ҳамда халқаро тажрибани инобатга олган ҳолда, энг юқори сотиб олиш қиймати ва битимнинг бошқа муҳим жиҳатлари бўйича энг рақобатбардош шартларни таклиф этган 3 нафар талабгор аниқланди. Мазкур талабгорларга таклифларини янада яхшилаш учун 2026 йил 23 январь соат 23:59 (Тошкент вақти билан)га қадар қўшимча муддат берилади.

BO босқичи якунлари ҳамда навбатдаги жараён тўғрисида барча талабгорлар Консультантлар томонидан жараён хати (Process Letter) орқали индивидуал равишда хабардор қилинади.

Мазкур ёндашув Давлат активларини хусусийлаштириш ва хусусийлаштириш жараёнларини мувофиқлаштириш давлат комиссияси томонидан маъқулланди.

Давлат активлари агентлиги Консультантлар билан ҳамкорликда савдонинг барча жараёнлари тўғрисида жамоатчиликка ахборот бериб, иштирокчиларни хабардор қилиб борилишини таъминлайди.

Дисклеймер

Давлат активлари агентлиги сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.

Ушбу эълон ёки унинг мазмунининг бирон-бир қисми мазкур эълон чоп этилишидан келиб чиқиб тахмин қилиниши мумкин бўлган Давлат активлари агентлигининг Жамиятни сотиш билан боғлиқ бирор-бир шаклдаги мажбурияти сифатида талқин қилинмаслиги керак. Давлат активлари агентлиги ўз хоҳишига кўра ҳар қандай вақтда ва ҳар қандай муносабатда, биргаликдаги ёки шахсий жавобгарликни ўз зиммаларига олмасдан:

(i) Савдо жараёнининг барча босқичлари муддатларига ўзгартириш киритиш;

(ii) турли хил манфаатдор томонлар учун турли хил тартиб-қоидалар бўйича иш тутиш ва/ёки Давлат активлари агентлиги томонидан кўзда тутилган режа-жадвал ва тартиб доирасида исталган бошқа потенциал харидорни (харидорларни) олдиндан огоҳлантирмасдан чиқариб ташлаган ҳолда бир ёки бир нечта потенциал харидорлар билан музокаралар олиб бориш;

(iii) аниқ сабабга кўра сотиш жараёнини тўхтатиш;

(iv) ва/ёки исталган вақтда ва сабабларни тушунтирмасдан Савдога тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни олиб бориш/тугатиш ҳуқуқларини ўзида сақлаб қолади.