2027-jılǵı mámleketlik byudjette de sociallıq baǵdar saqlanǵan boladı
2026-11-16 09:30:00 / Májilisler

Atap ótilgenindey, usı jıldıń juwmaǵı boyınsha mámleketimizdiń ekonomikası keminde 8 procentke ósiwi, jalpı ishki ónimniń kólemi 200 milliard dollardan, xalıqtıń jan basına tuwra keletuǵın dáramat bolsa 5,2 mıń dollardan artıwı kútilmekte.
Erisilgen nátiyjeler ekonomikanı rawajlandırıwdıń jańa basqıshına ótiw ushın bekkem tiykar jaratpaqta. Atap aytqanda, 2030-jılǵa barıp jalpı ishki ónimniӊ kólemin 300 milliard dollarǵa, kelesi on jılda xalıqtıń jan basına dáramattı 10 mıń dollarǵa jetkeriw maqset etilgen.
Konstituciyamızda Ózbekstannıń sociallıq mámleket ekeni bekkemlep qoyılǵan, insan, onıń ómiri hám qádir-qımbatı joqarı qádiriyat sıpatında tán alınǵan. “Insan qádiri ushın” degen iygilikli princip Jańa Ózbekstanda ámelge asırılıp atırǵan barlıq reformalardıń bas ólshemine aylanǵan. Sebebi, ekonomikalıq rawajlanıwdıń tiykarǵı mazmun-mánisi, bárinen burın, onıń nátiyjesi hár bir insan, hár bir shańaraqtıӊ turmısında seziliwi, xalqımızdıń abadanlıǵınıӊ artıwı, sapalı bilimlendiriw hám medicinalıq xızmetlerden paydalanıw imkaniyatlarınıń keńeyiwi jáne múnásip turmıs sharayatlarınıń jaratılıwında kóriniwi kerek.
Mámleketlik byudjettiń sociallıq baǵdarlanǵanlıǵı kelesi jılı da saqlap qalınıwı mine, usı tiykarǵı maqsetlerge xızmet etedi.
Sonıń ishinde, bilimlendiriw hám densawlıqtı saqlaw tarawlarında ámelge asırılıp atırǵan reformalardı qarjılandırıw ushın jámi 176 trillion sumǵa shamalas qarjı qaratıw rejelestirilmekte. Bilimlendiriwge 114,3 trillion sum (ótken jıldan 14 trillion sum kóp), medicinaǵa 61,4 trillion sum (ótken jıldan 12 trillion sum kóp) ajıratılıwı názerde tutılǵan.
Sonday-aq, aymaqlar hám máhállelerdiӊ infrastrukturasın jaqsılaw, xalıqtıń bántligin hám dáramatların arttırıw, insan kapitalın rawajlandırıw jáne sociallıq qorǵawdı kúsheytiw ushın 70 trillion sum ajıratılatuǵını belgilenbekte.
Sociallıq minnetlemelerdi turaqlı qarjılandırıw ushın ekonomikanıń jıllıq ósiw pátlerin keminde 7 procent dárejesinde támiyinlew, bar rezervler hám jańa texnologiyalıq faktorlardı iske qosıw zárúr ekenligi atap ótildi.
Usı maqsette kelesi jıldan ekonomikalıq ósiwdiń jańa modeline ótiw, hár bir tarmaqta joqarı qosımsha qun jaratıw, miynettiӊ ónimdarlıǵın arttırıw, eksport potencialın keńeytiw hám joqarı dáramatlı jumıs orınların kóbeytiw tiykarǵı wazıypalar etip belgilenbekte.
Májiliste uzaq múddetli joqarı ekonomikalıq ósiwdi támiyinlewge qaratılǵan jańa kózqaraslar kórip shıǵıldı. Xalıqaralıq tájiriybe turaqlı rawajlanıwdıń tiykarǵı faktorları eksportqa baǵdarlanǵan básekige shıdamlı óndiris, texnologiyalar transferi, investiciyalardıń nátiyjeliligi, makroekonomikalıq turaqlılıq hám ekonomikalıq siyasattıń ózgeriwsheń sharayatlarǵa beyimlesiwsheńligi ekenin kórsetpekte.
Sonnan kelip shıǵıp, ekonomikalıq ósiwdiń jańa modeliniń tiykarın zamanagóy sanaat siyasatı quraytuǵını belgilenbekte. Bul siyasat joqarı qosımsha qunlı ónimlerdi tayarlawǵa ótiw, aldınǵı texnologiyalardı tartıw, milliy kárxanalardıń xalıqaralıq óndiris shınjırlarına integraciyasın kúsheytiw hám eksporttıӊ quramın diversifikaciyalawǵa qaratılǵan.
Atap aytqanda, ximiya hám neft-ximiya, mashina qurılısı, elektrotexnika, toqımashılıq, farmacevtika hám basqa da perspektivalı sanaat tarmaqların jedel rawajlandırıw boyınsha jańa strategiya islep shıǵılmaqta.
Jańa sanaat siyasatı sheńberinde hár bir tiykarǵı tarmaqqa iri xalıqaralıq kompaniyalar hám brend investorlardı tartıw, zamanagóy sanaat zonaların qáliplestiriw, lokalizaciyalawdı tereńlestiriw hám kárxanalardıń texnologiyalıq potencialın arttırıw rejelestirilmekte. 2027-jılı hár bir perspektivalı tarmaqqa keminde 2-3 ten iri investordı tartıw názerde tutılǵan.
Sonıń menen birge, yarımótkizgishler, robototexnika, biotexnologiyalar, elektromobiller ushın joqarı texnologiyalıq komplektlewshi bólekler hám akkumulyatorlar islep shıǵarıw sıyaqlı jańa baǵdarlardı ózlestiriwge ayrıqsha itibar qaratılmaqta.
Bul maqsetlerdi ámelge asırıw ushın xalıqaralıq brendlerdi tartıw, ilimiy-izertlew hám qollanbalardı qollap-quwatlaw jáne básekige shıdamlı milliy islep shıǵarıwshılardı rawajlandırıwdıń jańa xoshametlew mexanizmleri názerde tutılmaqta.
Ekonomikalıq ósiwdiń dawamlılıǵın támiyinlew ushın strukturalıq reformalardı izbe-iz dawam ettiriw de úlken áhmiyetke iye. Bul baǵdarda mámleketlik kárxanalar hám banklerdi transformaciyalaw, menshiklestiriw processlerin jedellestiriw, energetika hám transport infrastrukturasın jetilistiriw, insan kapitalın rawajlandırıw jáne Jáhán sawda shólkemine aǵza bolıw procesin juwmaqlaw tiykarǵı wazıypalar sıpatında kórsetildi.
Onda mámleketlik investiciyalardı jeke menshik kapital ushın qolaylı sharayat jaratıwǵa baǵdarlaw, ekonomikalıq ósiwdi qarjılandırıwdıń zamanagóy mexanizmlerin qáliplestiriw hám investiciyalardıń ekonomikalıq nátiyjeliligin arttırıwǵa ayrıqsha itibar qaratıladı.
Májiliste 2027-jılǵa mólsherlengen tiykarǵı makroekonomikalıq prognozlar kórip shıǵıldı.
Esap-sanaqlarǵa bola, jalpı ishki ónimniӊ kólemi 2027-jılı 232 milliard dollarǵa jetiwi prognoz etilmekte.
Sonıń menen birge, inflyaciyanıӊ dárejesin 2027-jılı 6 procentke, 2028-2029-jılları bolsa 5 procentke shekem tómenletiw, altınsız eksport kólemin 2027-jılı derlik 40 milliard dollarǵa jetkeriw názerde tutılmaqta.
Prezentaciyada 2027-jıl ushın Mámleketlik byudjettiӊ dáramatların 416 trillion sum, qárejetlerin bolsa 464 trillion sum muǵdarında belgilew názerde tutılıp atırǵanı málim etildi. Byudjet joybarı ekonomikalıq ósiwdiń 7 procentlik prognozı tiykarında qáliplestirilmekte.
Jáhándegi geosiyasiy hám ekonomikalıq anıqsızlıqlar sharayatında makroekonomikalıq turaqlılıqtı támiyinlewge ayrıqsha itibar qaratıldı. Atap aytqanda, kelesi jılı inflyaciyanı 6 procentten arttırmaw, ulıwma fiskal jetispewshilikti jalpı ishki ónimge salıstırǵanda 3 procent sheńberinde saqlaw áhmiyetli wazıypa etip belgilendi.
2027-jılı da tiykarǵı salıq stavkaların ózgerissiz saqlaw názerde tutılmaqta. Bunday sharayatta byudjet dáramatların kóbeytiwdiń tiykarǵı deregi ekonomikalıq jedellikti qollap-quwatlaw, salıq bazasın keńeytiw, jasırın ekonomikanıӊ úlesin qısqartıw jáne salıq hám bajıxana hákimshiligin jetilistiriw bolıwı atap ótildi.
Usı múnásibet penen sanlastırıw hám jasalma intellekt texnologiyaların keńnen engiziw arqalı salıq hám bajıxana túsimlerin qosımsha arttırıw, isbilermenler ushın qolaylı hám ashıq-aydın ortalıq jaratıw boyınsha anıq wazıypalar belgilendi.
Prezidentimiz byudjet qárejetleriniń hár bir sumı anıq nátiyje beriwi kerek ekenligin atap ótti. Sonlıqtan, qarjılardı maqsetli baǵdarlaw, nátiyjesiz qárejetlerdi qısqartıw, mámleketlik investiciyalar hám subsidiyalardıń nátiyjeliligin arttırıw, byudjet intizamın kúsheytiw máselelerine ayrıqsha itibar qaratıldı.
Atap aytqanda, investiciyalıq baǵdarlama sheńberindegi qurılıs joybarlarında byudjet qarjılarınıń jumsalıwın tolıq baqlap barıw imkaniyatın beretuǵın sanlı qadaǵalaw sistemasın sınaq tárizinde engiziw wazıypası qoyıldı.
Májiliste ekonomikalıq ósiwdi qarjılandırıwdıń jańa mexanizmleri de dodalandı. Bank sistemasında jeke menshik kapitaldıń qatnasıwın keńeytiw, kredit resursların kóbeytiw, investiciyalıq joybarlardı qarjılandırıwda mámleketlik-jeke menshik sheriklik imkaniyatlarınan paydalanıw hám xalıqaralıq finans institutları menen birge islesiwdi jedellestiriw zárúr ekenligi atap ótildi.
Juwapkerlerge 2027-jılı 65 milliard dollarlıq sırt el investiciyasın tartıw boyınsha tarmaqlar hám aymaqlar kesiminde anıq rejelerdi islep shıǵıw tapsırıldı.
Májiliste bildirilgen pikir-usınıslar tiykarında 2027-jıl ushın Mámleketlik byudjet joybarınıń tiykarǵı baǵdarları belgilep alındı.
Nızamshılıqqa muwapıq, bul joybar hám onıń orınlanıwın támiyinlew ilajları jergilikli Keńeslerde dodalanadı hám juwmaǵında Oliy Majlis Nızamshılıq palatasına kirgiziledi.

