Sırtqı siyasat hám Qáwipsizlik

Ózbekstan Respublikası mámlekettiń milliy máplerinen kelip shıqqan halda ashıq, óz-ara paydalı hám konstruktivlik sırtqı siyasat júrgizbekte. Respublikanıń búgingi sırtqı siyasatı dúnya hám regiondaǵı jedel ózgerip atırǵan jaǵdaydı, sonday-aq, mámlekettegi keń kólemli ishki ózgerislerdi esapqa alǵan halda qurılmaqta.

Ózbekstan Respublikası sırtqı siyasiy iskerliginiń tiykarǵı maqseti — mámlekettiń ǵárezsizligi hám suverenitetin bekkemlew, xalıq aralıq maydanda onıń ornı hám rolin kúsheytiw, mámleket átirapında qáwipsizlik hám turaqlılıq sheńberin jaratıw, respublikanıń sırtqı ekonomikalıq máplerin jedel alǵa qoyıwdan ibarat.

Búgingi kúnge shekem Ózbekstan Respublikası dúnyanıń 159 mámleketi menen diplomatiyalıq qatnasıqlar ornatqan. Tashkentte 47 sırt el elshixanası, 3 bas konsullıq, 13 húrmetli konsul, 26 xalıq aralıq shólkem wákilxanası, 28 sırt el húkimetler aralıq hám húkimetlik shólkem wákilxanası, 1 sawda wákilxanası jumıs alıp barmaqta.

Sırt ellerde hám xalıq aralıq shólkemler janında Ózbekstan Respublikasınıń 60 diplomatiyalıq hám konsullıq wákilxanaları jumıs alıp barmaqta. Ózbekstan 100 den aslam xalıq aralıq shólkemlerdiń aǵzası bolıp, kóp tárepleme birge islesiwdiń túrli strukturaları menen óz-ara baylanıslardı rawajlandırmaqta.

 

Ótken jıllar dawamında elimizdiń qorǵanıw qábiletin bekkemlew boyınsha salmaqlı jumıslar ámelge asırıldı. Milliy armiya zamanagóy qural-jaraq hám texnikalar menen támiyinlenbekte. Áskeriy xızmetkerlerdiń jawıngerlik hám ruwxıy tayarlıq dárejesi izbe-iz arttırılmaqta, qorǵanıw sanaatınıń potencialı bekkemlenbekte.

Qorǵanıw ministrligi áskerlerinde jańa taktikalıq usıllar engizilip, shınıǵıwlardıń sanı hám intensivligi 1,5 esege arttırıldı, pilotsız ushıw apparatları bólimleri hám qánigeler tayarlaw orayları shólkemlestirildi. Armiyanı sanlastırıw boyınsha baslanǵan jumıslar nátiyjesinde málimleme qáwipsizligi, basqarıw hám kórsetilip atırǵan xızmetlerdiń nátiyjeliligi sezilerli dárejede arttı. Mámleketimiz basshısınıń baslaması menen áskeriy bilimlendiriw sisteması túp-tiykarınan jańalanıp, qánigeli professor-oqıtıwshı hám instruktorlardan ibarat Áskeriy qáwipsizlik hám qorǵanıw universiteti shólkemlestirildi.

Bilimlendiriw procesine oqıtıwdıń aldınǵı sanlı, sonıń ishinde, jasalma intellektke tiykarlanǵan texnologiyaları, zamanagóy bahalaw sistemaları engizilgeni áskeriy kadrlar tayarlawdıń sapasın jańa basqıshqa alıp shıqtı.