ǴMDA sheńberindegi ámeliy birge islesiwdi jáne de keńeytiw áhmiyetli ekenligi atap ótildi

Mámleketimiz basshısı 10-oktyabr kúni Dushanbe qalasında bolıp ótken Ǵárezsiz Mámleketler Doslıq Awqamı basshıları keńesiniń gezektegi májilisinde qatnastı.

Tájikstan Respublikası Prezidenti Emomali Rahmonnıń basshılıǵında ótken sammit jumısında Ázerbayjan Respublikası Prezidenti Ilhom Aliev, Belarus Respublikası Prezidenti Aleksandr Lukashenko, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Rossiya Federaciyası Prezidenti Vladimir Putin, Túrkmenstan Prezidenti Serdar Berdimuhammedov, Armeniya Bas ministri Nikol Pashinyan hám ǴMDA bas xatkeri Sergey Lebedev qatnastı.
Kún tártibine muwapıq, Doslıq awqamı sheńberindegi ámeliy birge islesiwdi jáne de keńeytiwdiń áhmiyetli máseleleri kórip shıǵıldı.

Mámleketimiz basshısı sóziniń aldında global siyasat hám ekonomikadaǵı boljap bolmaytuǵın processler jáne xalıqaralıq institutlardıń roli tómenlep atırǵanına qaramastan, ǴMDA óziniń turaqlılıǵın, nátiyjeliligin hám zárúrligin kórsetiwdi dawam etip atırǵanın atap ótti.

On jıllar dawamında jolǵa qoyılǵan mexanizmler hám baylanıslar sebepli ekonomikalıq, sociallıq hám gumanitarlıq máselelerdiń barlıq baǵdarlarında tıǵız birge islesip kelinbekte.
– Biz ǴMDA sheńberinde birge islesiwdi bunnan bılay da bekkemlew, sonday-aq, tábiyǵıy sheriklerimiz bolǵan mámleketler menen ámeliy birge islesiwdiń nátiyjeliligin arttırıwdan mápdarmız, – dedi Ózbekstan Prezidenti.

Soń mámleketimiz jetekshisi Doslıq Awqamı sheńberindegi ámeliy birge islesiwdi bunnan bılay da keńeytiw boyınsha bir qatar usınıs hám baslamalardı alǵa qoydı.

Dúnya ekonomikasındaǵı jaǵdaydıń keskinlesiwi, protekcionizmniń kúsheyiwi hám turaqlı rawajlanıw jolında jańa qáwip-qáterlerdiń payda bolıp atırǵanın esapqa alǵan halda ekonomikalıq sheriklikti keńeytiw shólkemniń sózsiz tiykarǵı baǵdarı ekeni kórsetip ótildi.

Ózbekstannıń ǴMDAdaǵı sherikleri menen tovar almasıw kólemi ótken jılı 11 procentke artqanı hám bul kórsetkish usı jılı da ósiwde dawam etip atırǵanı qanaatlanıwshılıq penen atap ótildi. Bunday kórsetkishler tarmaqlararalıq kooperaciya tereńlesip atırǵanı hám óz-ara investiciyalar aǵımı kóbeyip atırǵanı sebebinen bolıp esaplanadı.

Bar imkaniyatlardı jáne de tolıq iske qosıw, birge islesiwdiń búgingi pátin saqlap qalıw maqsetinde Ózbekstan Prezidenti birgeliktegi háreketlerdi tómendegi tiykarǵı baǵdarlarǵa qaratıwdı usınıs etti.
Birinshiden, tovar almasıwdı kóbeytiw ushın jáne de qolaylı sharayatlardı qáliplestiriw.

Ayırım tovarlardı, birinshi gezekte, awıl xojalıǵı ónimlerin jetkerip beriw procesinde tártip-qaǵıyda hám talaplardı ápiwayılastırıw hám milliy bazarlarǵa kiriw, sonıń ishinde, mámleketlik satıp alıwlarda qatnasıw zárúr ekenligi atap ótildi.

Sonday-aq, ǴMDA Ekonomikalıq keńesi sheńberinde sırtqı konyunktura ózgerislerine jedel juwap beriw hám sawda aǵımlarınıń baǵdarın ózgertiw boyınsha mexanizmlerdi iske qosıw, texnikalıq tosqınlıqlar hám muwapıqlıqtı bahalawǵa baylanıslı hújjetlerdi tán alıw haqqındaǵı kelisimlerdiń joybarların kelisiw baǵdarındaǵı jumıslardı jedellestiriw maqsetke muwapıq ekenligine itibar qaratıldı.

Ekinshiden, transport tarawındaǵı birge islesiwdi tereńlestiriw.
ǴMDA mákanındaǵı transport tarmaǵındaǵı bar koridorlardıń nátiyjeliligin tómenletip atırǵan mashqalalı jaǵdaylar elege shekem saqlanıp atırǵanı atap ótildi. Bul barlıq túrdegi transportlar menen integraciyalasqan málimleme-logistika orayların shólkemlestiriwdi talap etpekte.

Júk tasıw infrastrukturasın modernizaciyalaw ushın jeke menshik investiciyalardı tartıw áhmiyetli ekenligin esapqa alıp, Ózbekstanda transport tarawında mámleketlik-jeke menshik sheriklikti keńeytiw máseleleri boyınsha konferenciya ótkeriw baslaması alǵa qoyıldı.

Úshinshiden, óz-ara investiciyalardıń ósiwin xoshametlew hám kooperaciya joybarların qollap-quwatlaw.
Bul baǵdarda arnawlı ekonomikalıq hám sanaat zonaların qollap-quwatlaw hám rawajlandırıw boyınsha “jol kartası”n tayarlaw, kooperaciyanı tereńlestiriw hám biznesti tartqan halda innovaciyalıq startaplardı alǵa qoyıw ushın ǴMDAnıń Venchur platformasın jaratıw, kelesi jılı Tashkenttegi “INNOPROM” kórgizbesi negizinde Innovaciyalıq sanaat forumın ótkeriw usınıs etildi.

Tórtinshiden, energetika tarawındaǵı birge islesiwdi rawajlandırıw.
Ózbekstan basshısınıń atap ótkenindey, búgingi kúnde ǴMDAdaǵı sherikler menen dástúriy hám alternativ energiya dáreklerinen paydalanıw, sonıń ishinde, atom elektr stanciyalarınıń qurılısı tarawında bir qatar iri strategiyalıq joybarlar ámelge asırılmaqta.

Mámleketimiz basshısı ǴMDA mámleketlerinde energetika sektorın innovaciyalıq rawajlandırıw boyınsha uzaq múddetli baǵdarlama islep shıǵıw hám ámelge asırıwdı usınıs etti.
Besinshiden, sanlastırıw tarawındaǵı birge islesiw.

Mámleketimiz basshısı bıyıl avgust ayında Samarqandta ótken “ǴMDAda jasalma intellekt texnologiyaların rawajlandırıw” temasındaǵı xalıqaralıq forum bul tarawdaǵı kooperaciya baǵdarında óz-ara qızıǵıwshılıq hám imkaniyatlar artıp baratırǵanın kórsetkenin atap ótti. Usı múnásibet penen bul tarawda Ámeliy birge islesiwdi tereńlestiriw boyınsha kóp tárepleme háreketler rejesin islep shıǵıwdı usınıs etti.

Mámleketimiz basshısı ilim, bilimlendiriw, mádeniyat hám kórkem óner tarawlarında birgeliktegi joybarlar menen baǵdarlamalardı keńeytiw áhmiyetli ekenligine ayrıqsha itibar qarattı.
– Mámleketlerimizde bilimlendiriw sektorı hám miynet bazarı jedel rawajlanıp atırǵanın esapqa alıp, Diplomlar, qánigelik hám akademiyalıq baǵdarlamalardı óz-ara tán alıw haqqında jańa mámleketleraralıq kelisimdi tayarlaw, Professional standartlar hám qánigelik talapların úylestiriw mexanizmin engiziw zárúr, dep esaplaymız, – dedi Prezident.

Kelesi jılı kún tártibine innovaciyalıq ekosistemalardı qáliplestiriw, jas áwladtıń dóretiwshilik hám intellektuallıq potencialın qollap-quwatlaw ushın Jaslar laboratoriyasın jaratıw máselesin kirgizgen halda, ǴMDA Jaslar forumın Xiywada ótkeriwge tayarlıq bildirildi.

Regionallıq qáwipsizlik máselelerine toqtap ótip, Prezidentimiz sırtqı siyasiy uyımlar hám arnawlı xızmetler arasındaǵı sistemalı hám tıǵız baylanıslardı dawam ettiriw áhmiyetli ekenligine itibar qarattı. Awǵanstandaǵı jaǵday ayrıqsha itibardı talap etedi.
– Ózbekstan Awǵanstanda uzaq múddetli tınıshlıq, tatıwlıq hám turaqlı rawajlanıwdı támiyinlewdiń isenimli tárepdarı ekenin atap ótemen. Usı múnásibet penen bul mámlekette iri investiciyalıq hám infrastrukturalıq joybarlardı ámelge asırıwda birgelikte qatnasıw imkaniyatların kórip shıǵıwdı usınıs etemiz, – dedi mámleketimiz jetekshisi.

Sóziniń juwmaǵında Shavkat Mirziyoev Sergey Lebedevtiń ǴMDA Bas xatkeri lawazımına qayta tayınlanıwın qollap-quwatladı hám Túrkmenstan Prezidenti Serdar Berdimuhamedovqa shólkemge basshılıqtı qabıl etip alǵanı múnásibeti menen tabıslar tiledi.

Májiliste Doslıq Awqamına aǵza basqa mámleketler delegaciyalarınıń basshıları da shıǵıp sóyledi.
Sammit juwmaǵında ǴMDA sheńberindegi birge islesiwdiń tiykarǵı baǵdarları boyınsha kelisim hám qararlar toplamına qol qoyıldı.

Usınıń menen Ózbekstan Respublikası Prezidenti Shavkat Mirziyoevtiń Tájikstanǵa ámeliy saparı juwmaqlandı.ры жуўмақланды.