Densawlıqtı saqlaw

Keyingi jıllarda Ózbekstanda hár bir puqara ushın joqarı sapalı hám qánigeli medicinalıq xızmet sistemasın jaratıw áhmietli wazıypa sıpatında belgilenip, bul baǵdarda  keń kólemli reformalar ámelge asırılıp atırǵanı sizlerge jaqsı belgili.

Ózbekstan Respublikası Prezidentiniń 2018 jıl 7 dekabrdegi “ Ózbekstan Respublikası den sawlıqtı saqlaw sistemasın tupten jetilistiriw boyınsha kompleks ilajlar tuwrısında”gi PF-5590 -san pərmanı menen 2019 - 2025 jıllarda Ózbekstan Respublikasınıń den sawlıqtı saqlaw sistemasın rawajlandırıw koncepciyası tastıyıqlandi.

Ózbekstan Respublikası Prezidentiniń 2022 jıl 25 apreldegi “2022 - 2026 jıllarda analıq həm balalıqtı qorǵawdı kúsheytiw tuwrısında”gi PQ-216 -san qararı menen 2022 - 2026 jıllarda analıq həm balalıqtı qorǵawdı kúsheytiw boyınsha is-ilajlar jobası tastıyıqlanǵan.

Ózbekstan Respublikası Prezidentiniń 2024 jıl 22 yanvardaǵı “Den sawlıqtı saqlaw salasında reformalardı tereńlestiriw boyınsha qosımsha ilajlar tuwralı” PQ-38-san qararı menen Densawlıqtı saqlaw sistemasın jetilistiriwdiń ústin turatuǵın baǵdarların əmelge asırıw boyınsha “JOL KARTASÍ” tastıyıqlanǵan.

Sońǵı jılları medicina tarawınıń ózine 230 trillion sum qaratıldı. Sonıń esabınan orınlarda 187 jańa poliklinika hám emlewxana iske qosıldı, 1 mıń 244 i rekonstrukciyalanıp, úskenelendi.

Nátiyjede baslanǵısh medicina mákemeleriniń quwatlılıǵı 60 procentke artıp, medicinalıq xızmet xalıqqa biraz jaqınlastı. Burın tiykarınan paytaxtta orınlanǵan joqarı texnologiyalıq hám diagnostika-emlew usıllarınıń 400 den aslamı aymaqlarda ámelge asırılmaqta. Júzlegen quramalı operaciyalar wálayat oraylarına, az invazivli operaciyalar rayon dárejesine túsirildi.

Sońǵı jılları elimizdiń medicinasında aldıńǵı texnologiyalar engizilip, bilimlendiriw processlerine de keńnen qollanılmaqta. Atap aytqanda, úsh joqarı bilimlendiriw mákemesi negizinde Tashkent mámleketlik medicina universiteti shólkemlestirildi. Úrgensh mámleketlik medicina institutınıń jumısı jolǵa qoyıldı. Segiz medicinalıq joqarı bilimlendiriw mákemesi xalıqaralıq akkreditaciyadan ótti. Bul tarawda zamanagóy bilim hám kónlikpelerge ie kadrlar tayarlaw imkaniyatları jáne de keńeydi.

Elimiz boylap mámleketlik medicina mákemeleri zamanagóy málimleme-kommunikaciya úskeneleri menen támiyinlendi, birden-bir sanlı infrastruktura qáliplestirildi. 2024-2025-jıllarda 3 mıńnan aslam medicina mákemesi lokal tarmaq penen támiyinlendi. Mıńlaǵan jańa kompyuterler satıp alınıp, texnikalıq baza jańalandı.

Tez medicinalıq járdem xızmetinde elektron basqarıw jolǵa qoyılıp, shaqırıqlarǵa jetip barıw waqtı 25-30 minuttan 10-15 minutqa shekem qısqartıldı.

Sonday-aq, "Elektron recept" sistemasınıń jumısı jolǵa qoyılıwı nátiyjesinde artıqsha dári jazıw jaǵdayları 40 procentke azaydı, dári-dármaqlar aylanısı ashıqlastı. Barlıq medicinalıq maǵlıwmatlar biometrikalıq qorǵaw astında saqlanıp, jeke maǵlıwmatlardıń qáwipsizligi támiyinlenbekte.