Ekonomika tarmaqları hám sociallıq tarawda jasalma intellekt texnologiyalarınan paydalanıw keńeytiledi

Mámleketimiz basshısınıń oktyabr ayında qabıl etilgen “Jasalma intellekt texnologiyaların bunnan bılay da rawajlandırıwǵa baylanıslı qosımsha ilajlar haqqında”ǵı pármanı hám “Jasalma intellekt texnologiyaların 2030-jılǵa shekem rawajlandırıw strategiyasın tastıyıqlaw haqqında”ǵı qararı menen elimizde bul baǵdarda zárúr infrastruktura jaratıw hám kadrlar tayarlaw ushın barlıq sharayatlar jaratıldı.

Sonıń ishinde, 2030-jılǵa shekemgi strategiya tastıyıqlanıp, Sanlı texnologiyalar ministrligi janında tiyisli oray ashıldı. Jasalma intellekt texnologiyalarınan paydalanıw ushın zárúr esaplaw infrastrukturası qurılmaqta. Sonıń ishinde, AQShtıń “Nvidia” kompaniyası menen birgelikte super kompyuter klasterin iske qosıw joybarı ámelge asırılmaqta. Medicina tarawında jasalma intellekt boyınsha 5 joybar engizilmekte. Atap aytqanda, insult, kókirek ragin jasalma intellekt járdeminde anıqlaw arqalı diagnostika waqtı 80 procentke únemlenip, ómir ushın qáwipli jaǵdaylar erte anıqlanbaqta.

Prezidentimiz bul jeterli emes ekenligi, jasalma intellekt járdeminde diagnostikanı qollanıw múmkin bolǵan kesellikler túrin jáne de keńeytiw zárúr ekenligin atap ótti.

Usı múnásibet penen sırt elli birge islesiwshiler menen birgelikte respublikalıq qánigelestirilgen medicina oraylarında bawır, ókpe hám prostata ragi, infarkt jáne quramalı súyek sınıwların diagnostikalawda medicinalıq súwretlerdi jasalma intellekt járdeminde tallaw sistemaların engiziw rejelestirilgen.

Kelesi oqıw jılınan mektep, texnikum hám joqarı oqıw orınlarında oqıwshı hám studentlerge jasalma intellektti oqıtıw baslanadı. Bunıń ushın informatika muǵallimleri tayarlanbaqta. Biraq tek ǵana olardı emes, pútkil mektep jámáátin jasalma intellektten paydalanıwǵa úyretip, muǵallimlerdiń júklemesin azaytıw kerek ekenligi kórsetip ótildi. Sonda muǵallimde óz ústinde islewge kóbirek waqıt qaladı, dep atap ótildi májiliste.

Prezentaciyada bul baǵdardaǵı jańa kózqaraslar kórip shıǵıldı.

Sonıń ishinde, mektep bilimlendiriwi ushın jasalma intellektke tiykarlanǵan platformanı engiziw usınıs etildi. Onda oqıtıwshınıń virtual járdemshisi islep shıǵıladı hám platformaǵa integraciyalanadı. Bul sheshim muǵallimlerge temaǵa baylanıslı lekciya tekstleri, prezentaciyalar, testler, sabaq rejelerin dúziw, imtixan processlerin qadaǵalawda járdem beredi.

Májiliste hákimlerdiń sanlı texnologiyalar hám jasalma intellekt boyınsha másláhátshileriniń mamanlıǵın arttırıw baǵdarlaması haqqında málimleme berildi.

Transport tarawında da jasalma intellekt joybarların ámelge asırıw rejelestirilgen. Sonıń ishinde, jasalma intellekt járdeminde jollardaǵı qaǵıydabuzarlıqlardı avtomatikalıq anıqlaw, vagonlardıń texnikalıq jaǵdayın monitoring etiw arqalı temir jolda avariyalar qáwpin azaytıw boyınsha usınıslar tanıstırıldı.

Bunnan tısqarı, kosmoslıq texnologiyalar boyınsha jańa baslamalar islep shıǵılǵan. “Samarqand-2028” jasalma joldasın islep shıǵıw jumıslarınıń barısı kórip shıǵıldı. Jerdi aralıqtan zondlawǵa mólsherlengen bul joldas ushın jasalma intellekt moduli islep shıǵıladı. Sputnikten túsirilgen súwretlerdi hawa sapasın birlemshi bahalaw, awıl xojalıǵı eginleri hám toǵaylardı monitoring etiwde qollanıw múmkin boladı.

Prezentaciyanıń juwmaǵında mámleketimiz basshısı kórip shıǵılǵan joybarlardıń orınlanıwın jedellestiriw, jasalma intellekt texnologiyalarınan ekonomika tarmaqları hám sociallıq tarawda paydalanıwdı keńeytiw boyınsha juwapkerlerge anıq tapsırmalar berdi.